Навоийда “Зармитан” олтин конига қарашли ёрдамчи шахтадан жасад топилгани ҳақида хабарлар тарқалди. Бош прокуратура ахборот хизмати раҳбари Ҳаёт Шамсутдинов ҳолат юзасидан “Дарё”га маълумот берди.
Аниқланишича, Навоий вилояти Хатирчи туманида яшовчи 30 ёшли О.Н. 2023 йил 25 декабрь куни “Навоий кон-металлургия комбинати” АЖ Жанубий кон бошқармасига қарашли “Зармитан” кони ерости шахтаси 840-сатҳидан, таркибида олтин моддаси бўлган маъданли тошларни талон-торож қилиш учун келган. 2024 йил 15 январь куни соат 19:00 ларда шахтадан чиқаётганида, арқон узилиб кетиши оқибатида 10-15 метрлик пастликка тушиб кетган ва оғир тан жароҳати олиб вафот этган.
О.Н. олган тан жароҳати бўйича судга оид тиббий экспертиза тайинланган.
Ҳозирда ушбу ҳолат юзасидан Навоий вилояти ИИБ Тергов бўлинмаси томонидан терговга қадар текширув ҳаракатлари олиб борилмоқда.
Изоҳ (0)