Ижтимоий тармоқларда «Навоий кон металлургия комбинати»га қарашли конда тоғ жинсларини портлаш ишлари нотўғри олиб борилгани сабабли одам вафот этгани ҳақида хабарлар тарқалди.
Унда «НКМК»га қарашли Учқудуқ туманида жойлашган Шимолий кон бошқармасидаги «Кўк патас» конида тоғ жинсларини портлаш ишлари нотўғри олиб борилгани сабабли «скважина»да снаряд портламай қолгани, шундан сўнг экскаватор машинисти автосамосвалларга юк ортаётганида снаряд портлаб кетгани айтилган.
«Навоий кон металлургия комбинати» матбуот хизмати ҳолатни тасдиқлади. Расмий маълумотга кўра, 26 ноябрь куни тахминан соат 22:55 атрофида «НКМК» АЖ Шимолий кон бошқармаси «Кокпатас» конида экскаватор ёрдамида кон массасини қазиб олиш жараёнида портлаш содир бўлган. Портлаш оқибатида экскаватор машинисти вафот этган.
Вилоят прокуратураси матбуот хизмати бундан ташқари, ЭКГ-40 русумли экскаватор кабинасида бўлган, машинист ёрдамчиси Т.М. бўйин ва ўнг қўл кафт соҳаси 1 ва 2-даражали куйиши тан жароҳати олганини маълум қилди.
Айни пайтда Вазирлар Маҳкамасининг «Ишлаб чиқаришдаги бахтсиз ҳодисаларни ва ходимлар саломатлигининг меҳнат вазифаларини бажариш билан боғлиқ бошқа хил зарарланишини текшириш ва ҳисобга олиш тўғрисидаги низом»га асосан махсус текшириш комиссияси томонидан портлаш сабаблари ва бахтсиз ҳодиса тафсилотлари ўрганилмоқда.
Мазкур ҳолат юзасидан ИИВ ҳузуридаги 2-сон ИИБ тергов бўлинмаси томонидан терговга қадар текширув ҳаракатлари олиб борилаётган бўлиб, судга оид тиббий экспертиза тайинланган.
Изоҳ (0)