Illinoys universiteti tadqiqotchilari yo‘llardagi tirbandliklarda uzoq vaqt turib qolish va tezpishar taomlar kafesiga ko‘proq qatnash o‘rtasida bog‘liqlikni aniqladi. Bu omil har yili millionlab aholi salomatligiga salbiy ta’sir ko‘rsatadi.
Los Anjeles o‘tkazilgan tahliliy maʼlumotlarga ko‘ra, kutilmagan tirbandliklar oddiy tirbandliklar bilan solishtirganda tez ovqatlanish restoranlariga tashrif buyurishni 1% ga oshirgan. Bir qarashda bu ko‘rsatkich unchalik katta ko‘rinmasligi mumkin, ammo yirik shaharlar miqyosida yiliga 1,2 million marta qo‘shimcha tarzda fastfud yeyish haqida gap ketmoqda. Tadqiqot mualliflari o‘z xulosalarini noto‘g‘ri ovqatlanish odatlarini kamaytirish nuqtai nazaridan muhim deb hisoblashini bildirdi.
Olimlar Los Anjelesdagi ikki yillik yo‘l harakatlari, trafik va tirbandlik haqidagi ma’lumotlarni o‘rganib chiqdi. Shuningdek shu vaqt oralig‘ida uyali telefondan foydalanadigan nechta kishi fastfud restoranlariga tashrif buyurgani haqida ma’lumotlarni tahlil qildi. Natijada bunday muassasalarga tashrif buyurishning ko‘payishi va tirbandliklar o‘rtasida bevosita bog‘liqlik mavjudligini ifodalaydigan kompyuter modelini ishlab chiqdi.
Kechki soatlarda ishdan qaytayotgan aholi oziq-ovqat do‘konlariga kamroq tashrif buyuradi. Ular, ehtimol, do‘konda to‘xtab, uyda kechki ovqat pishirish uchun masalliq sotib olishdan ko‘ra shunchaki burger va qovurilgan kartoshka sotib olishni ma’qul ko‘radi.
Har bir yirik shaharda tirbandlik ham, tez ovqatlanish restoranlari ko‘p bo‘lganligi sababli, ushbu tendensiya faqatgina Los Anjelesga xos emas. Yo‘l tirbandligi va nosog‘lom ovqatlanish o‘rtasidagi bog‘liqlik butun dunyo shaharlaridagi tirbandlikni kamaytirishga hamda transport infratuzilmasini yaxshilashga yana bir sabab bo‘ladi.
Izoh (0)