Яроқсиз нарсаларни ўз ҳолига қайтаришга ёрдам берувчи 15 та лайфҳак (фото)

Кундалик ҳаётда севимли кийим, нарсаларингизга доғ тегиши ёки бузилиши каби ҳолатлар тез-тез учраб туради. Бундай муаммоларни оддий усуллар ёрдамида бартараф этиш мумкин.

Кийимда қолган тер доғи 

Сода ва лимон шарбатини аралаштириб, ҳосил бўлган аралашма билан доғли жойни артинг. Агар кийим қалин бўлса, аралашмани ўша жойга суртиб, бироздан сўнг ювиб ташланг.

Тональ креми доғи

Бундай вазиятда соқол олишда ишлатиладиган кўпик ёки кремдан фойдаланинг. Кийимни ювишдан аввал доғ тегган жойга бир ош қошиқ кўпик ёки крем суртиб қўйинг.

Помада доғи

Соч лаки кийимдаги лаб бўёғи доғларини кетказишда ёрдам беради. Лакни доғга сепиб, бир неча дақиқага қолдиринг. Лак қуригандан сўнг, кийимни ювинг. Бу усулни қўллашдан аввал кийим ёрлиғида кимёвий тозалаш ҳақида эслатма бор ёки йўқлигига ишонч ҳосил қилинг.

Осилиб қолган тугма

Агар кийимингиздаги тугма осилиб қолган бўлса, тирноқ лаки ипни вақтинчалик қотириб қўйиши мумкин. Фақатгина лакни оз миқдорда ва эҳтиёткорлик билан суртинг.

Кирланган замш туфли

Баъзан замш туфлиларни тозалашда махсус чўтка ҳам ёрдам бермайди, бундай вақтда пойабзални пилка (тирноқ учун эгов) билан тозаланг. Аммо пилка қаттиқ металлдан бўлмасин. Шунингдек, пойабзал юзасини бир йўналишда тозаланг.

Чарм пойабзалдаги намдан қолган доғ

Бундай доғни сирка кетказиши мумкин. Тиш чўткани сиркага ботириб, доғли жойларга эҳтиёткорлик билан суртинг.

Локланган пойабзалдаги чизиқлар

Бундай вақтда оддий пахта дискига вазелин суртиб, пойабзалнинг муаммоли жойларини артиб чиқинг.

Чарм пойабзалларнинг эскирган кўриниши

Агар севимли туфли ёки ботилёнингизга «ажин» тушган бўлса, оз миқдордаги намловчи крем ёки лосьон шимдирилган сочиқ билан артинг. Бу усул билан уларга иккинчи ҳаёт бағишлайсиз.

Кроссовкалардаги ёмон ҳид

Машғулотлардан сўнг пайдо бўладиган тер ва ёмон ҳидларни йўқотиш учун кроссовкангизга озгина ичимлик содасидан сепиб қўйинг.

Хира тортган туфли

Севимли оёқ кийимингизни ялтиратишда ойна тозаловчи восита яхши натижа беради.

Қизил винодан қолган доғ

Бунинг учун доғ бўлган жойни оқ вино билан намланг. Бироздан сўнг ювиб ташланг.

Кийимдаги ёғ доғи

Бундай кийимни ювишдан олдин доғ тегган жойга озгина идиш ювиш воситасидан суртиб қўйинг.

Кийим ипининг чиқиб қолиши

Либосдаги чиқиб қолган ипни жойига қайтариш жуда осон: асталик билан ип чиққан жойни турли томондан тортиб қўйинг.

Капрон колготка ситилиши

Бундай вақтда яна тирноқ лаки ёрдамга келади. Фақат рангсиз лакдан фойдаланинг.

Яхши «юрмайдиган» темир тасма

Куртка ёки халатлардаги темир тасма яхши юрмаётган бўлса, пахта диски ёрдамида вазелин теккизиб чиқинг.