«Картага нотўғри PIN-код ёзиб қўйилади». Шуҳрат Қурбонов пластик карта йўқолганда, пулларни сақлаб қолишнинг антиқа усули ҳақида маълумот берди

«Дарё» интернет-нашри ҳамда Тошкент шаҳри ҳокимлиги қошидаги Жамоатчилик кенгаши ҳамкорлигида ташкил этилган «Маҳалла. Муаммо. Мулоҳаза» лойиҳасининг 2-сони меҳмони — Telegram’даги «Kurbanoff.net» канали муаллифи, иқтисодчи Шуҳрат Қурбонов бўлди. Кўрсатувнинг бу галги мавзуси — онлайн фирибгарлик.

Шуҳрат Қурбонов дастур давомида пластик карта йўқолганда, ичидаги пулларни сақлаб қолишнинг Европада тарқалган усули ҳақида маълумот берди.

Европада битта лайфҳак бор. Картанинг орқасига қалам билан нотўғри PIN-код ёзиб қўйилади. Топиб олган фирибгар «тушунмаган одам паролини ёзиб қўйибди» деб ўйлаб, банкоматга теради, уч мартадан кейин карта блокка тушади. Шу орқали сақлаб қолиш мумкин пулларни.

Мисол учун, 3 та 7 ёзасиз, охирги рақами сал бошқачароқ, тушунарсиз ёзилсин, 2 га ҳам, 7 га ҳам ўхшайдиган қилиб. Бир теради «7777» қилиб — хато; икки теради «7772» қилиб — яна хато. Учинчисида карта блокланади.

Бу ҳам бир йўли-да. Карта паролини исталган пайт ўзгартириш мумкин, чеклов йўқ, хоҳласангиз, ҳар куни ўзгартиринг».