Мухлислари томонидан “Ўзбек реп қироли” дея эътироф этиладиган рэпер Шоҳрух 31 январь санасида 39 ёшни қарши олди. У ўзбек шоу-бизнесидаги ўта ёпиқ ва махфий ҳаёт тарзини олиб борадиган кам сонли санъаткорлардан. Хонанда 2007 йилдан бери деярли интервью бермайди, ижтимоий тармоқлардаги саҳифаларида эса асосан депутатлик фаолиятига оид маълумотлар билан бўлишади. Қуйида рэпернинг интервьюларида ошкор қилган маълумотлари асосида унинг ҳаёти ва ижодига назар ташлаймиз.
Асли исм-фамилияси Шоҳрух Шодмонов бўлган Шоҳрух рэпер 1986 йилнинг 31 январида Тошкент шаҳрида дунёга келган. Шоҳрух 2004— 2005 йилларда ўтказилган Тарона тақдимотида “Йил ютуғи” ва “Йил кашфиёти” каби номинацияларда ғолиб бўлган.
Шоҳрух рэпернинг илк концерт дастури 2006 йилнинг 17—19 февраль кунлари “Халқлар дўстлиги” санъат саройида бўлиб ўтган. Ушбу концертда куйланган 20 та қўшиқнинг 17 таси жонли ижро этилган. 2007 йилнинг 22—25 февраль кунлари ўтказилган концертида эса рэпер 22 та қўшиқнинг барчасини жонли куйлаган.
Шоҳрух рэпер 2022 йилнинг 21-октябрь куни ижодининг 15 йиллиги муносабати билан юбилей концертини тақдим этди. Унинг яна бир концерт дастури 2024 йилнинг 1 ноябрида Ҳумо арена муз саройида аншлаг тарзда ўтказилди.
“Ал-вакил” гуруҳи солисти Музаффарнинг ижодига таъсири
Шоҳрух болалигида “Ал-вакил” гуруҳини тинглагани ҳамда маълум муддат унинг солисти Музаффар билан ижодий ҳамкорлик қилгани ҳақида айтиб ўтган.
— Музаффар билан биржага иш бўйича борганимизда танишиб қолганмиз. Музаффар ўша ерда ишлаб юрарди. У билан дуэт куйлаганмиз. Менга шеърлар ёзиб берган.
Ёқмайдиган қўшиғи ҳақида
— “Ёроней” қўшиғим ўзимга унча манзур бўлмаган, лекин мухлислар яхши қабул қилган. Бу қўшиқ ҳаттоки унинг муаллифи Бобур Умаровга ҳам ёқмаган. Иккаламиз бу қўшиқни ёзиб, бир йил ушлаб турганмиз. Чиқарсак қанақа бўларкан деб иккиланганмиз. Лекин муваффақиятли қўшиқ чиқди.
Тўйларга деярли бормаслиги сабаби
— Тўйларга жуда кўп чақиришади. Лекин ҳаммасига ҳам боравермайман. Чунки тўйларда одамлар дам олади, спиртли ичимликлар ичишади. Менга эса бундай муҳит ёқмайди. Ўзим билган, таниган инсонлар бўлса албатта бораман.
2016 йилнинг 12 май куни Тошкентдаги тўйхоналардан бирида Шоҳрух Злата исмли қизга уйланди. Бу тўй рэпернинг мухлислари орасида муҳокамаларга сабаб бўлди. Сабаби рэпер Instagram’даги саҳифасига ўғли билан тушган суратларини мунтазам жойлаштириб келган. Рэпер мухлисларининг саволларига жавоб тариқасида Злата билан никоҳдан ўтиб, оила даврасида кичик тадбир ўтказгани, катта тўйни эса қилишга имкон бўлмагани ҳақида сўзлаб берди.
Шоҳрух ва Злата жуфтлиги 2014 йилда ўғил, 2017 йилда қиз фарзандли бўлишган. Рэпер 2020 йилда учинчи марта ота бўлганини, унинг оиласида яна бир ўғил фарзанд дунёга келганини маълум қилган.
Аёли билан қандай танишгани ҳақида
— Рафиқам билан кафеда танишганмиз, севиб турмуш қурганмиз. Инсон бошқа бир инсонни севиб қолса, унинг қайси миллатга мансуб эканлигининг ҳам аҳамияти йўқ. Аёлим мени санъаткор сифатида танирди, лекин менинг мухлисим бўлмаган. У бошқа йўналишдаги мусиқаларни эшитади. Биз соф ўзбекча оиламиз, аёлимни ҳам “ўзбек қилиб қўйганмиз”. Деярли барча урф-офатларимиз ва анъаналаримизни ўрганиб олган.
“Рэп мен учун биринчи ўринда эмас”
Шоҳрух агар бор эътиборини ижодга қаратганида у анча кўп натижаларга эришишини, бироқ санъат унинг учун асосан хобби эканлигини бир неча марта такрорлаган.
— Мактабда ўртача ўқиганман. Ўшандаёқ рэпер бўлиш орзусида яшардим. “Ал-вакил” гуруҳининг қўшиқларини эшитиб юрардим. Хориж эстрадасидан Эминем ва Тупакни эшитардим. Санъат мен учун биринчи ўринда эмас, агар биринчи ўринга қўйганимда эришганларим ҳозиргидан 2-3 марта кўпроқ бўларди.
Шоҳрух билан дуэт куйлаш нархи — 5 минг долларми?
Бир неча йил аввал репга қадам қўяётган санъаткорлар Шоҳрух билан дуэт айтиш учун 5 минг доллар тўлаши керак, деган гаплар чиққан.
— Бунақа гапни биринчи марта эшитишим. Менга дуэт билан мурожаат қиладиган рэперлар ҳақиқатдан ҳам реп айтишни билиши керак. Кейин куйланадиган қўшиқ матни сифатли бўлиши керак. Шундагина ҳамкорлик қилишимиз мумкин. Шу пайтгача ҳечам пулга реп айтмаганман. Таклифлар кўп бўлади, лекин таклиф қилишдан олдин яхшилаб унинг тўғри ёки нотўғрилигини ўйлаб кўриш керак.
Ҳамкасблари билан қандай муносабатда?
— Ҳамма ҳамкасблар билан бир хил муносабатдаман. Салом-алигимиз бор. Лекин ҳеч ким билан кафе-ресторанга ёки чойхонага бориб ўтирмайман. Чунку ҳамманинг ўз “круги” бор.
Депутатлик фаолияти
2019 йил 22 декабрь куни Шоҳруҳ Шодмонов ўз номзодини ЎзЛиДеПдан кўрсатган ҳолда Тошкент шаҳар Чилонзор тумани кенгашига Халқ депутати этиб сайланган. У 2024 йилнинг 27-октябрь куни яна бир бор депутат сифатида сайланди. Шоҳрух Instagram’даги саҳифасида ўзининг сиёсий фаолиятини батафсил ёритиб келмоқда.
Изоҳ (0)