Хонанда Жаҳонгир Отажоновнинг сиёсат майдонига кириб, Ўзбекистон президентлиги сайловида ўз номзодини илгари суриши ҳақидаги қарори қизғин муҳокамаларга сабаб бўлди. Аслида, санъат соҳаси вакилларининг сиёсатда ҳам фаолият юритиши янгилик эмас. Масалан, Шерали Жўраев, Юлдуз Усмонова, Муяссар Раззоқова каби санъаткорлар бир пайтлар парламент депутатлигига сайланиб, маълум муддат сиёсатчилар курсисида ўтирган. Бугунги кунда ҳам ўзбек шоу-бизнеси вакиллари орасида депутат мақомига эга таниқли инсонларни учратиш мумкин. «Дарё» уларни бир саҳифага жамлади.
Шоҳрух рэпер
Реп йўналишидаги тароналари билан минглаб ёшларнинг севимли хонандасига айланган таниқли қўшиқчи Шоҳрух Шодмонов ҳам депутат.
У ЎзЛиДеПдан халқ депутатлари Чилонзор тумани кенгашига депутат этиб сайланган. Хонанда икки йил олдин Instagram саҳифаси орқали депутат бўлганлиги ҳақида ёзаркан, хусусан, шундай деганди:
«Азиз ҳамюртлар! Мана, сизларнинг овозларингиз билан Тошкент шаҳар Чилонзор тумани кенгашига халқ депутати бўлиб сайландим! Мендан баландпарвоз гаплар кутманг, менинг фикримча, ҳар бир депутат сайланган ҳудудида бор муаммолар билан максимал ишлаш керак, халқ эса баҳо беради. Барчангиздан миннатдорман! Ишончингиз учун раҳмат!».
Шоҳрух ижтимоий тармоқлардаги саҳифалари орқали депутат сифатида турли сиёсий тадбирларда тушган суратларини тез-тез жойлайди. Бундан ташқари, унинг аралашуви билан ечимини топган сайловчиларнинг муаммоларини ҳам баъзан ёритиб боради.
Бастакор Ойдин Абдуллаева
2019 йилда ўтказилган сайловларда таниқли бастакор ва танқидчи, мусиқашунос ўқитувчи Ойдин Абдуллаеванинг номзоди Олий Мажлис Қонунчилик палатаси депутатлигига 141-«Темир йўлчи» сайлов округидан кўрсатилган ва депутат этиб сайланган.
Профессор илмий унвонига эга бастакор 2019 йилгача Ўзбекистон давлат консерваториясининг «Бастакорлик ва чолғулаштириш» кафедрасида ишлаш билан бирга, халқ депутатлари Тошкент шаҳар кенгаши депутати ҳам бўлган.
«Адолат» СДПдан номзоди кўрсатилиб, депутатликка сайланган Ойдин Абдуллаева ҳозирда Олий Мажлис Қонунчилик палатасининг Фан, таълим, маданият ва спорт масалалари қўмитаси аъзосидир.
Актёр Ёқуб Аҳмедов
«Ўгай она», «Турист», «Салом севги, хайр севги», «Заҳарли томчилар» каби ўнлаб кино ва сериаллар орқали актёр сифатида танилган Ёқуб Аҳмедов икки йил аввал халқ депутатлари Наманган шаҳар кенгаши депутатлигига сайланган.
Унинг номзоди «Водий автотех сервис» МЧЖ, Coliseum plus ва «Доктор А» МЧЖ таъсисчиси сифатида Ўзбекистон «Миллий тикланиш» демократик партиясидан депутатликка кўрсатилган.
37 яшар актёр 2021 йил 10 январда Халқ депутатлари Наманган вилоят кенгаши депутати этиб сайланган.
Маълумот учун, Ёқуб Аҳмедов таниқли футболчи Одил Аҳмедовнинг акаси ҳисобланади.
Тошпўлат Маткаримов
90 йилларда «Санамжон», «Армон», «Оқ тулпор» каби қўшиқлари билан шуҳрат қозонган Ўзбекистонда хизмат кўрсатган артист Тошпўлат Маткаримов ҳам икки йилдирки депутатлик курсисида.
Унинг номзоди ЎзМТДПдан кўрсатилган ва 38-«Телов» сайлов округидан Халқ депутатлари Тошкент вилояти кенгаши депутатлигига сайланган.
Тошпўлат Маткаримов ҳозирда Оҳангарон шаҳридаги «Қурама» фолклор-этнографик халқ ансамбли раҳбари сифатида ҳам меҳнат қилмоқда.
Миролим Исажонов тайёрлади
Изоҳ (0)