Малайзиянинг Five Petroleum компанияси Ўзбекистонда автомобилларга ёқилғи қуйиш шохобчалари тармоғини қурмоқчи. Бу ҳақда “Ўзбекнефтгаз” матбуот хизмати хабар берди.
Маълум қилинишича, 2025 йил 18 январь куни “Ўзбекнефтгаз” бошқаруви раиси ва Малайзиянинг Fivе Petroleum компанияси бош директори ўртасида музокаралар бўлиб ўтди. Учрашувда Ўзбекистонда Фиве Petroleum бренди остида ёқилғи қуйиш шохобчалари тармоғини яратиш масаласи муҳокама қилинди. Маҳсулот ва хизматлар сифатини ошириш учун замонавий технологиялар ва халқаро стандартларни жорий этишга асосий эътибор қаратилди.
Шунингдек, томонлар Малайзия компаниясининг мамлакат ҳудудларида транспорт-логистика инфратузилмасини яратиш имкониятларини кўриб чиқди.
Учрашув якунида томонлар ҳамкорликни мустаҳкамлаш ва республика ёқилғи-энергетика сектори учун стратегик аҳамиятга эга бўлган ташаббусларни ривожлантиришга келишиб олди.
Ўзбекистоннинг Малайзиядаги элчиси Каромиддин Гадоев 2024 йилнинг августида Fivе Petroleum Malaysia компанияси асосчиси ва бош директори Кинг Лим Чин Фуи билан учрашув ўтказганди. Унда Малайзия томони билан Тошкент шаҳри ва кейинчалик республиканинг бошқа ҳудудларида ёқилғи қуйиш шохобчалари тармоғини яратиш ва уларни замонавий ускуналар билан жиҳозлаш бўйича лойиҳани амалга ошириш ишларини бошлашга келишиб олинганди.
Fivе Petroleum Malaysia компаниясига 2020 йилда асос солинган. Компания Малайзия бўйлаб 110 дан ортиқ автомобилларга ёқилғи қуйиш шохобчаларини бошқаради. Шунингдек, 400 дан ортиқ ёқилғи қуйиш шохобчаларига эга BNPetrol компаниясининг 60 фоиз улушига эгалик қилади.
Изоҳ (0)