Malayziyaning Five Petroleum kompaniyasi O‘zbekistonda avtomobillarga yoqilg‘i quyish shoxobchalari tarmog‘ini qurmoqchi. Bu haqda “O‘zbekneftgaz” matbuot xizmati xabar berdi.
Ma’lum qilinishicha, 2025-yil 18-yanvar kuni “O‘zbekneftgaz” boshqaruvi raisi va Malayziyaning Five Petroleum kompaniyasi bosh direktori o‘rtasida muzokaralar bo‘lib o‘tdi. Uchrashuvda O‘zbekistonda Five Petroleum brendi ostida yoqilg‘i quyish shoxobchalari tarmog‘ini yaratish masalasi muhokama qilindi. Mahsulot va xizmatlar sifatini oshirish uchun zamonaviy texnologiyalar va xalqaro standartlarni joriy etishga asosiy e’tibor qaratildi.
Shuningdek, tomonlar Malayziya kompaniyasining mamlakat hududlarida transport-logistika infratuzilmasini yaratish imkoniyatlarini ko‘rib chiqdi.
Uchrashuv yakunida tomonlar hamkorlikni mustahkamlash va respublika yoqilg‘i-energetika sektori uchun strategik ahamiyatga ega bo‘lgan tashabbuslarni rivojlantirishga kelishib oldi.
O‘zbekistonning Malayziyadagi elchisi Karomiddin Gadoyev 2024-yilning avgustida Five Petroleum Malaysia kompaniyasi asoschisi va bosh direktori King Lim Chin Fui bilan uchrashuv o‘tkazgandi. Unda Malayziya tomoni bilan Toshkent shahri va keyinchalik respublikaning boshqa hududlarida yoqilg‘i quyish shoxobchalari tarmog‘ini yaratish va ularni zamonaviy uskunalar bilan jihozlash bo‘yicha loyihani amalga oshirish ishlarini boshlashga kelishib olingandi.
Five Petroleum Malaysia kompaniyasiga 2020-yilda asos solingan. Kompaniya Malayziya bo‘ylab 110 dan ortiq avtomobillarga yoqilg‘i quyish shoxobchalarini boshqaradi. Shuningdek, 400 dan ortiq yoqilg‘i quyish shoxobchalariga ega BHPetrol kompaniyasining 60 foiz ulushiga egalik qiladi.
Izoh (0)