Ўзбекистонда бензинга талабнинг кескин ошиши ва нархлар кўтарилиши мумкинлигини инобатга олиб, қатор чоралар кўрилган. Бу ҳақда “Ўзбекнефтгаз” АЖ нефть маҳсулотлари логистикаси департаменти бошлиғи Жамшид Багиров “Дарё” мухбирига берган интервьюсида маълум қилди.
“Чоралар кўрилган”
Жамшид Багировнинг айтишича, ҳозирда ўтган йилги қиш совуқ келгани ва бир муддат бензин дефицит бўлганини инобатга олиб, талаб кескин ошиши бўйича чоралар кўрилган.
“Ҳозирда ўзимизда ишлаб чиқарилган бензин захираларини яратганмиз. Бундан ташқари, хорижий ҳамкорлар, хусусан, Россия билан бензин импорти бўйича шартномалар имзолаб қўйганмиз. Агар ушбу маҳсулотга бу йил ҳам талаб кескин ортса, тақчиллик ва нарх ошиб кетишининг олдини олиш учун бензин импорт қиламиз ҳамда истеъмолчиларга етказамиз. Вилоятларда бензин импорт қиладиган тижорат компанияларига маҳсулотни сақлаш учун шароит яратиб берганмиз. Бу йил ҳам талаб ошса, вилоятлардаги тадбиркорлар билан биргаликда бензин импорт қилиш чоралари кўрилмоқда”, — деди мутахассис.
Кунлик бензин сотуви қанча?
Жамшид Багиров ҳозирда “Бухоро нефтни қайта ишлаш заводи” кунига 3 минг тонна, “Фарғона нефтни қайта ишлаш заводи” ҳар куни минг тоннадан бензин ишлаб чиқариши ва маҳсулот биржа савдоларида сотилишини айтди.
“Бундан ташқари, улгуржи нефть маҳсулотлари савдоси билан шуғулланадиган тадбиркорлар ўзлари Туркманистон, Қозоғистон ва Россиядан бензин импорт қилиб, республикада сотади. Бунга ҳеч қандай тўсиқ йўқ. Аксинча, тадбиркорлар олиб келиб сотиши учун АИ–80 бензини акциз солиғидан озод қилинган, импорт учун катта чегирмалар берилган. Вилоятларда жойлашган нефть базаларида тадбиркорлар бензин олиб келиб сотиши учун жойлар ажратиб берганмиз”,—деди у.
Бугунги кунда 1 тонна АИ–80 бензинининг биржадаги нархи 5 миллион 995 минг сўм (1 тонна 1315 литрга тенг). “Ўзбекнефтгаз” бир неча йўналишлар қаторида нефть маҳсулотларидан автобензин ва дизель маҳсулотлари ҳам ишлаб чиқаради. Бензин нархлари маҳсулот таннархи ва транспорт харажатларидан келиб чиқиб белгиланади.
Ўзбекистонда нечта заправка бор?
Ҳозирда мамлакатда 2 500 та Автомобилларга ёқилғи қуйиш шохобчалари (АЁҚШ) фаолият олиб боради.
“Шундан “Ўзбекнефтгаз”га қарашли заправкалар сони (UNG Petro) 70 та бўлиб, республикадаги жами АЁҚШларнинг 3 фоизини ташкил этади. Қолган 98 фоиз заправкаларда аҳолига бензин етказиб бериш хусусий сектор, тадбиркорлар ёрдамида амалга оширилади. Компаниямиз тасарруфидаги АЁҚШлар бошқа заправкалар билан тенг ҳуқуқли. Ҳеч қандай ортиқча имтиёзлари йўқ. Улар ҳам барча тадбиркорлар қатори биржа савдоларида қатнашиб, ўзларига керакли ҳажмдаги бензинни сотиб олади ва белгилаган нархларида сотади”, —деди Жамшид Багиров.
Аввалроқ “Ўзбекнефтгаз” заправкаларида АИ–92 бензини нархи аввалги ҳолатига қайтиб, 9200 сўмдан сотилаётгани хабар қилинганди.
Изоҳ (0)