Ҳиндистонда “Маҳа Кумбҳа Мела” номли йирик диний фестивал бошланди. Ҳар 12 йилда бир марта ўтказиладиган бу тадбирда 400 миллион киши иштирок этади. Бу ҳақда The Guardian хабар берди.

Миллионлаб ҳиндуий динига эътиқод қилувчилар фестивалнинг бошланишини нишонлаш учун Уттар-Прадеш штатидаги Праяграж шаҳри Ганга дарёси соҳилларида тўпланган. Ҳиндуизм диний тақвимида бу “фестиваллар фестивали” деб аталади. Бу йил 45 кун давом этадиган тадбирга 400 миллиондан ортиқ киши қатнашиши кутилмоқда. Бу тарихдаги энг юқори кўрсаткич ҳисобланади.

“Маҳа Кумбҳа Мела” “катта кўза байрами” деган маънони англатади. Фестивалнинг асосий маросими — сувда чўмилиш бўлиб, бу нафақат танани, балки руҳни ҳам гуноҳлардан поклайди деб ишонилади. Агар маросим байрам пайтига тўғри келса, чексиз қайта туғилиш айланмасидан чиқиш мумкин, деган қараш мавжуд.

Кўпчилик фестивал ҳиндуиларнинг бирлиги ва қудратининг кучли ҳамда сиёсий рамзи эканини таъкидлайди. Шу сабабли, бу йилги фестивал тарихдаги энг қимматли тадбирга айланиши кутилмоқда. 

Фестивал арафасида ташкилотчилар ва ҳокимият вакиллари иштирокчилар учун махсус мобил илова ишга туширган. Бу илова ибодатхоналар, чўмилиш жойлари, овқат дўконлари, тиббиёт чодирлари ва йўқолганлар марказларини топишга ёрдам беради. Бундан ташқари, 11 тилда ишлайдиган сунъий интеллектга асосланган чат-бот WhatsApp орқали ҳар қандай саволларга жавоб беришга кўмаклашади.

Йўқолиб қолган зиёратчилар муаммосини ҳал қилиш учун ҳар бир сайёҳга радиочастотали билагузук берилади. Хавфсизлик ва ҳаракатланишни назорат қилиш учун минглаб сувости ва ҳаво дронлари ишга туширилади. 2000 дан ортиқ дрон иштирокидаги ёритиш шоуси эса ҳиндуилар мифологиясидаги ҳикояларни тасвирлайди.