Hindistonda “Maha Kumbha Mela” nomli yirik diniy festival boshlandi. Har 12 yilda bir marta o‘tkaziladigan bu tadbirda 400 million kishi ishtirok etadi. Bu haqda The Guardian xabar berdi.

Millionlab hinduiy diniga e’tiqod qiluvchilar festivalning boshlanishini nishonlash uchun Uttar-Pradesh shtatidagi Prayagraj shahri Ganga daryosi sohillarida to‘plangan. Hinduizm diniy taqvimida bu “festivallar festivali” deb ataladi. Bu yil 45 kun davom etadigan tadbirga 400 milliondan ortiq kishi qatnashishi kutilmoqda. Bu tarixdagi eng yuqori ko‘rsatkich hisoblanadi.

“Maha Kumbha Mela” “katta ko‘za bayrami” degan ma’noni anglatadi. Festivalning asosiy marosimi — suvda cho‘milish bo‘lib, bu nafaqat tanani, balki ruhni ham gunohlardan poklaydi deb ishoniladi. Agar marosim bayram paytiga to‘g‘ri kelsa, cheksiz qayta tug‘ilish aylanmasidan chiqish mumkin, degan qarash mavjud.

Ko‘pchilik festival hinduilarning birligi va qudratining kuchli hamda siyosiy ramzi ekanini ta’kidlaydi. Shu sababli, bu yilgi festival tarixdagi eng qimmatli tadbirga aylanishi kutilmoqda. 

Festival arafasida tashkilotchilar va hokimiyat vakillari ishtirokchilar uchun maxsus mobil ilova ishga tushirgan. Bu ilova ibodatxonalar, cho‘milish joylari, ovqat do‘konlari, tibbiyot chodirlari va yo‘qolganlar markazlarini topishga yordam beradi. Bundan tashqari, 11 tilda ishlaydigan sun’iy intellektga asoslangan chat-bot WhatsApp orqali har qanday savollarga javob berishga ko‘maklashadi.

Yo‘qolib qolgan ziyoratchilar muammosini hal qilish uchun har bir sayyohga radiochastotali bilaguzuk beriladi. Xavfsizlik va harakatlanishni nazorat qilish uchun minglab suvosti va havo dronlari ishga tushiriladi. 2000 dan ortiq dron ishtirokidagi yoritish shousi esa hinduilar mifologiyasidagi hikoyalarni tasvirlaydi.