“Dastingdan” qo‘shig‘i bilan tanilgan xonanda Feruza Karimovaning nafaqat ijodi, balki shaxsiy hayoti ham ko‘plab muhokamalarga sabab bo‘ladi. Bir necha yillik tanaffusdan keyin u yana ijodga qaytdi. Eng qizig‘i, ijodga qaytish jarayoni ham ko‘plab muhokamalarga sabab bo‘ldi.
“Sanʼatkorlar oilasida tug‘ilganman”
Xonanda hech qayerda tahsil olmagani va sanʼatkorlar oilasida tahsil olgani haqida aytib o‘tgan.
— Qo‘shiqchilik bo‘yicha hech qayerda tahsil olmaganman. Ammo oilamizda sanʼatkorlar bor, ikkita buvim ham halfachilik bilan shug‘ullanishgan. Bolaligimda buvilarim bilan birga ayollar davrasida qo‘shiq kuylaganimizni juda yaxshi eslayman. Undan keyin sportga mehr qo‘ydim. Suzish va yengil atletika bilan shug‘ullandim. Bir nechta chempionatlarda g‘olib bo‘lganligim bilan maqtana olaman. Ammo sanʼatga bo‘lgan qiziqishim ustunlik qildi. Lekin o‘sha vaqtda institutda o‘qishga imkonim bo‘lmadi, deydi xonanda.
“Prodyusserimga turmushga chiqdim”
Xonanda o‘zidan 12 yosh katta inson Baxtiyor Fattahov bilan qanday tanishgani va oila qurish tarixini quyidagicha eslaydi.
— 2014-yil turmush o‘rtog‘im bilan ko‘rishib qolib, 2015-yil ijod boshlandi. 2016-yil “Dastingdan” qo‘shig‘im chiqdi. Keyin ularda menga nisbatan iliqlik paydo bo‘lgan. Lekin men eʼtibor bermaganman. Prodyusermi prodyuser, ishmi ish, bo‘lgan u paytda. Ular o‘sha paytda birinchi oilasidan ajrashgan bo‘lgan. Ish paytida biz bilan ko‘rishib turardilar, suhbatlashardilar. Qarasam, yaxshi inson, mehribon, menga eʼtiborli. Hayoti haqida ham gapirib berardilar. Meni sekin-sekin ko‘niktirib, o‘ziga o‘rgatib, top etib, uzuk olib kelib, qarab turibdilar: “Menga turmushga chiqasizmi?” deb. Bir yil ishladim, xarakterlarini ko‘rdim, mendayam ularga nisbatan mehr paydo bo‘ldi. Turmush o‘rtog‘imni yaxshi ko‘raman, hurmat qilaman. Har doim har taraflama qo‘llab-quvvatlab kelganlar, deydi Feruza Karimova.
“U oilaning buzilishiga daxlim yo‘q”
Xonanda prodyuseriga turmushga chiqishdan oldin hayolidan qanday o‘ylar o‘tgani haqida ham so‘zlab bergan.
— Xayolimdan ko‘p narsa o‘tdi. Men turmushga chiqmaganman, qiz bola boshim bilan ijod boshlaganman. Ular mendan 12 yoshga katta. Mening birinchi turmushim, ularning esa ikkinchi turmushlari. Asosiy qiynagan narsa shu bo‘lgan. Ozmi, ko‘pmi ijod qilib qo‘ydim. Muxlislarim ko‘nglidan ozgina bo‘lsa ham joy oldik. Men haqimda muxlislar qanday fikr bildirishi mumkin. O‘zidan kattaga tegibdi yoki... Ko‘p narsa eshitdimda, to‘g‘risi. Oilasini ajratib yuboribdi, o‘z farzandlarini ham tashlab, shu qizga uylanibdi. Xotinini tashlab ketibdi shu qizni deb, degan juda ko‘p gaplarni eshitdik, u insonlardan ko‘nglim og‘ridi. Lekin sanʼatkor ko‘zi ko‘r, qulog‘i kar bo‘lishi kerakda. Xudo bor, bir kuni hammasi o‘rtaga chiqadi, o‘shanda bilishadi, dedim. Mening hech qanaqa daxlim bo‘lmagan. Faqat o‘ylaganmanki, keyingi hayotim nima bo‘ladi, oramizdagi farqni o‘ylaganman, ijodni ham o‘ylaganman. Qarasam, sohani tushunadilar, sanʼatni sevadilar, boshqacha nazar bilan qaramaydilar. Mayli, Allohga tavakkal, deb turmushga chiqqanman. Lekin mehrim bo‘lgan, deydi xonanda.
“Onam jiddiy qarshilik qilgan”
Feruza Karimova onasi va yaqinlari tomonidan qarshiliklar bo‘lganini ham yashirmadi.
-0Uf90ias.jpg)
— Turmushga chiqayotganimda onam jiddiy qarshilik qilgan. “Tenging topiladi”, deyishgan, tengim topilgan. U menga erlik qila olmasdi. Mening hisobimga yashardi. Meni ularning o‘tmishi qiziqtirmaydi. Menga ularning meni deb yashay boshlaganlaridan keyingi hayoti qiziq. Men o‘zim tengi bolaga turmushga chiqib, bir oy yashab, bir-birimizni tushunmay ajrashib ketib, “Ana, nomiga turmushga chiqib oldi. Sanʼatkorda, bitta bolani baxtsiz qildi”, degandan, ikkinchi marta uylanayotgan kattaroq yoshli insonni baxtli qilganim yaxshiroq. Odamlarning gapi, mayli. Men hech kimga javob bermayman. Allohga javob beraman faqat, deydi xonanda.
“Men sanʼatni tark etaman”
2021-yili xonanda bergan intervyularining birida sanʼatni tark etishi haqida aytib o‘tgandi. Ammo oradan uch yil o‘tib, noto‘g‘ri qaror qabul qilgani haqida gapirdi.
— Turmush o‘rtog‘im bilan Umra safariga borgach, sanʼatdan ketish haqida qaror qilgandim. Hijobga kirdim, to‘y-hashamlarga, konsertlarga umuman bormay qo‘ydim. Ammo bu hayot men uchun emas ekan. Ancha siqilib qoldim. Ro‘molimni muhokama qilayotganlarga aytib o‘tmoqchiman. Men ro‘molga dog‘ tushiradigan ish qilganim yo‘q. Hijobni yechishim men va Alloh o‘rtasidagi masala, bunda boshqalarning aralashishga haqqi yo‘q. Ichimdan nima o‘tganini o‘zim bilaman.Men ijodsiz, muxlislar olqishisiz yashay olmas ekanman, dedi xonanda.
“O‘zimdan o‘tgani o‘zimga ayon”
Xonanda og‘ir kasallikka chalingani, sochlari to‘kilib, ko‘p vazn tashlagani haqida gapirdi.
— Bir insonning hayotini bilmay turib, uni tanqid qilish oson. Men ham o‘zimdan o‘tganini o‘zim bilaman. Ro‘molni yechganim balki hayotimdagi eng katta xatomdir, bundan ko‘p afsuslanaman. Uyda siqilib qoldim, kasallikka chalindim. Bu holat turmush o‘rtog‘im va farzandlarim o‘rtasidagi munosabatimizga ham taʼsir etdi. Kasallikka chalinib, birdan sochlarim to‘kilib ketdi, oq tushdi. Ko‘p vazn tashlab, o‘zimga o‘xshamay qoldim. Oxiri turmush o‘rtog‘im ham qarorimni qo‘llab-quvvatladi. Ro‘molni yechishim ayrimlar o‘ylaganidek oson kechgani yo‘q, deydi xonanda.
“Men ranjidim”
Xonanda “Oy bor qizim” qo‘shig‘i tufayli hamkasbi bilan jiddiy kelishmovchilikka borgani haqida so‘zlab berdi.
— Agar so‘rab, roziligimizni olib qo‘shig‘imni ijro etishsa qarshi bo‘lmayman. Chunki qo‘shiq uchun mablag‘ sarflaganmiz, mehnat qilganmiz. Sherzod Ergashev qo‘shiqni aytayotgani haqida eshitdim, mayli, o‘sha qo‘shiq orqali ozmi-ko‘pmi mablag‘ ham topgandir. Ammo konsertda hech qanday o‘zgartirishsiz ijro etib, biror yerida qo‘shiq egasini aytib o‘tmaganini hech qanaqasiga oqlab bo‘lmaydi. Buni eshitib juda ranjidim. Turmush o‘rtog‘imga aytsam, “Mayli, erkaklarning ishiga aralashmang, o‘zim gaplashaman”, dedi. Hozir mualliflik huquqini himoya qilish bo‘yicha shug‘ullanishyapti, deydi xonanda.
Darvoqe, xonanda turmush o‘rtog‘i prodyuserlik qilgan seriallarda ham suratga tushgan.
Izoh (0)