Энергетика вазири Жўрабек Мирзамаҳмудов иқтисодчи, блогер Отабек Бакиров устидан прокуратура ва ИИВга шикоят аризаси киритди. Бу ҳақда Отабек Бакиров Telegram-каналида маълум қилди.
Шикоят Бакировнинг 2023 йил 5 июнь куни Сағбон подстанцияси билан боғлиқ муаммо ҳақида ёзган пости билан боғлиқ.
Билдирилишича, пост мундарижасида ҳақорат ва обрўсизлантириш ҳолатлари мавжуд ва бу бўйича Отабек Бакировга нисбатан тегишли тартибда чора кўрилиши лозим.
Вазир Мирзамаҳмудов органларга шикоят аризасини 2024 йил 10 октябрь куни тақдим этган.
Қизиқ тарафи, қачондир ҳайкал қўйиладиган Сағбон подстанцияси билан боғлиқ сурункали муаммо ёритилган пост 2023 йил 5 июнда ёки 1 йил-у 7 ой аввал ёзилган. Мирзамаҳмудов органларга шикоят аризасини 2024 йил 10 октябрда, яъни бир йил-у 4 ой ўтиб тақдим этмоқда.
Унданам қизиғи, вазир Мирзамаҳмудов аризасини “Лолазор” меҳмони бўлгач, 6 кун ўтиб қолдирган.
Яна бир қизиқ факт, адашмасам, “Лолазор”нинг биринчи сонидан кейин энергетикларнинг таклифи билан (вазир келади дейишганди) тинимсиз таъмирланаётган Сағбон подстанциясига ҳам боргандик ва кичик репортаж ҳам уюштиргандик.
Нима бўлгандаям, ўшандан кейин бизнинг Тошкент тумани Сағбондан узилган ва электр энергиясини бошқа, туманимиздаги подстанциялардан олмоқдамиз, дея қўшимча қилган Отабек Бакиров.
Иқтисодчига кўра, “шикоят аризаси фуқаро Мирзамаҳмудов тарафидан эмас, вазир Мирзамаҳмудов томонидан киритилган”.
Ариза ҳозирда пойтахт ИИБ Киберхавфсизлик бўлинмаси томонидан ўрганилмоқда.
Изоҳ (0)