Shavkat Mirziyoyev 20-noyabr kuni Qonunchilik palatasi majlisida bosh vazir lavozimiga Abdulla Aripov nomzodini ko‘rsatdi.
Prezident hukumat o‘z faoliyatini mutlaqo yangicha asosda tashkil etishi kerak, buning uchun unga kuchli rahbar, ya’ni, bosh vazir zarurligini, bu masalani atroflicha o‘ylab, O‘zbekiston bosh vaziri lavozimiga Abdulla Aripov nomzodini ko‘rsatishga qaror qilganini aytdi.
“Abdulla Aripov katta tashkilotchilik salohiyatiga ega bo‘lgan, ijro hokimiyati tizimida boy bilim va tajriba orttirgan, mas’uliyatni doimo chuqur his etadigan rahbar”, dedi davlat rahbari.
Ushbu nomzod bugun hukumat oldiga qo‘yilgan, ko‘lami va miqyosi benihoya katta bo‘lgan muhim vazifalarni hal etishda Vazirlar Mahkamasi faoliyatini samarali tashkil qilishi, hukumat a’zolari, vazirlik va idoralar rahbarlarini birlashtirib, yagona maqsad sari safarbar eta olishiga ishonch bildirdi.
Abdulla Aripov haqida
Abdulla Aripov O‘zbekiston hukumatiga 2016-yildan buyon rahbarlik qilib kelmoqda.
2016-yil sentyabrida u bosh vazir o‘rinbosari lavozimida ishlagan. O‘sha yilning 13-dekabrida O‘zbekiston Liberal-demokratik partiyasi tomonidan bosh vazirlik lavozimiga nomzodi ko‘rsatilgan. 14-dekabrda ushbu lavozimga tasdiqlangan. 2020-yil yanvarida bosh vazir lavozimiga qayta tasdiqlandi.
2024-yil 4-oktyabrda bosh vazir Abdulla Aripov mamlakat shaxmat federatsiyasi raisi etib saylandi. Mazkur lavozimda 2022-yilning may oyidan buyon ishlab kelayotgan Alisher Saʼdullayev federatsiya raisining birinchi o‘rinbosari bo‘ldi.
Izoh (0)