Британиялик хонанда, машҳур Оnе Direction поп гуруҳининг собиқ аъзоси Лиам Пейн Аргентина пойтахтидаги меҳмонхонанинг учинчи қаватидан йиқилди. Оғир тан жароҳатлари олган юлдуз воқеа жойида ҳалок бўлди. Бу ҳақда BBC нашри хабар бермоқда.
Маҳаллий полиция ходимлари берган маълумотларга кўра, 31 ёшли мусиқачи Буэнос Айресдаги CаsаSur Palermo меҳмонхонасининг учинчи қаватидан қулаб тушган. Бир қанча дақиқадан сўнг воқеа жойига тез ёрдам хизмати етиб келган, бироқ бу вақтда меҳмонхона ҳовлисида топилган Пейн аллақачон вафот этган.
“Лиам Жеймс Пейн, бастакор ва гитарачи, Оnе Direction гуруҳининг собиқ аъзоси бугун Палермо ҳудудидаги меҳмонхонанинг учинчи қаватидан қулаб вафот этди”, дейилади полиция баёнотида.
Шунингдек, бундан аввал полиция маҳкамасига гиёҳванд моддалар ва спиртли ичимликлар таъсири остида бўлган номаълум шахснинг безорилик хатти-ҳаракатлари ҳақида хабар келиб тушган.
Шаҳарнинг САME тез тиббий ёрдам хизмати раҳбари Альберто Кресентининг маҳаллий телевидениега берган маълумотга кўра, 40 метр баландликдан йиқилиш натижасида хонанданинг бош мия суяги жиддий шикастланган.
Пейн Аргентинага Оnе Direction гуруҳининг яна бир собиқ аъзоси — Найл Хораннинг концертига келган эди. Бундан бир неча кун аввал эрталаб Пейн ижтимоий тармоқларда Аргентинадаги саёҳати ҳақида пост қолдириб, уйга қайтишни интиқлик билан кутаётгани ҳақида ёзган эди.
Ҳозирда мусиқачининг уч юлдузли CаsаSur Palermo меҳмонхонасидаги хонаси Аргентина ҳуқуқ-тартибот идоралари ходимлари томонидан текширилмоқда. У ерда ичида номаълум кукун мавжуд бўлган бир нечта фолга пакетлари топилган. Воқеа жойида мутахассислар ишламоқда.
Британия Ташқи ишлар вазирлиги Аргентинада қўшиқчининг ўлими ҳақидаги хабарлар ортидан маҳаллий ҳокимият билан доимий алоқада эканини маълум қилди.
Лиам Пейн 1993 йил 29 августда туғилган. У Британиянинг Тhе Х Factor телекўрсатувида 2008 ва 2010 йилларда икки марта иштирок этган. Биринчи марта судья ва мусиқа продюсери Саймон Коуэлл унга аввало мактабни битириб, кейин танловда қатнашишни маслаҳат берган. 2010 йилда у Тhе Х Factor шоусида яна бир бор иштирок этган ва Cry Ме А River қўшиғи билан барча ҳайъат аъзоларини ҳайратда қолдирган.
Кейинчалик у бошқа иштирокчилар — Найл Ҳоран, Зайн Малик, Гарри Stayлс ва Луи Томлинсон билан биргаликда Оnе Direction гуруҳини ташкил қилди. Жамоа Х Factor шоусида ғалаба қозонмади, лекин поп мусиқа тарихидаги энг муваффақиятли гуруҳлардан бирига айланди. Улар бутун дунё бўйлаб 70 миллиондан ортиқ дискларни сотган.
Оnе Direction гуруҳи 2016 йилдан ўз фаолиятини тўхтатди ва ҳар бир иштирокчи яккахон тарзда ишлай бошлади.
Изоҳ (0)