Франсуа Олланд, Жастин Бибер ва шаҳзода Гарри йилнинг энг юксак дид билан кийинувчи шахслари деб топилди

Франция президенти Франсуа Олланд, канадалик хонанда Жастин Бибер ва британиялик шаҳзода Гарри 2015 йилнинг энг юксак дид билан кийинувчи кишилари рўйхатидан ўрин олди. «Газета.ru» хабарига кўра, рўйхат Financial Times газетаси томонидан эълон қилинган.

Рўйхатдан сиёсий арбоблар, мусиқачилар, актёрлар ва бошқа машҳурлар ўрин олган бўлиб, эътиборли томони, улар алоҳида ўринлар бўйича саралаб чиқилмаган.

Йилнинг энг юксак дид билан кийинувчи инсонлари орасида, жумладан, актриса Сиенна Миллер, Женнифер Лоуренс, Дакота Жонсон, Жулианна Мур ва Леа Сейду бор. Шунингдек, «Юлдузлар жанги» киносагасининг еттинчи қисми режиссёри Жей Жей Абрамс ва актёр Колин Фаррелл ҳам рўйхатга кирган.

Бундан ташқари, рейтингда Линейзи Монтеро ва Кендалл Женнер каби моделлар ҳам бор. Юксак дид билан кийинувчилар орасидан АҚШнинг собиқ биринчи хоними Ҳиллари Клинтон, Буюк Британия молия вазири Жорж Осборн ва Канада бош вазири Жастин Трюдо ҳам ўрин олган.

Шунингдек, футбол мураббийи Кике Санчес Флорес, ёзувчи Марлон Жеймс, One Direction гуруҳи вакили Гарри Стайлс, Ванесса Паради ва Жонни Деппнинг қизи — Лили Роуз Депп, хонанда ва шоир Патти Смит ҳам рўйхатга киритилган.