Ўзбекистонда давлат ва хусусий корхоналарга қанча миқдорда солиқ имтиёзлари берилмоқда?

Мамлакатда ҳар бир йўналишда фаолият олиб бораётган тадбиркорлик субъектларига турли миқдорлардаги солиқ имтиёзлари бериб келинмоқда. Солиқ қўмитаси 2023 йилда берилган имтиёзлар бўйича маълумотларни тақдим қилди. 

Ўтган 2023 йил давомида барча корхоналарга жами 13,2 трлн сўмдан ортиқ солиқ имтиёзлари қўлланган.

Ишлаб чиқаришдаги солиқ имтиёзлари

Ўтган йили ишлаб чиқариш фаолияти билан шуғулланувчи 67 322 та юридик шахс томонидан 41,6 триллион сўмга яқин солиқ тўланган. Шундан 18,9 триллион сўми 20 та солиқ тўловчи ҳисобига (НКМК ва ОКМК АЖдан ташқари) тўғри келади. Уларга йил давомида қарийб 2,5 триллион сўмлик солиқ имтиёзлари қўлланган. Имтиёз олган йирик солиқ тўловчиларнинг аксарияти давлатга қарашли. Улар орасида “Ўзбекнефтгаз” АЖ (4,8 триллион сўм солиқ тўлаган), UzAutoMotors (2,5 триллион сўм солиқ тўлаган) ва бошқалар бор.

Хизмат кўрсатиш соҳасида солиқ имтиёзлари

2023 йил январь–декабрь ойларида хизмат кўрсатиш фаолияти билан шуғулланувчи 166 938 та юридик шахс томонидан 27,5 триллион сўмдан ортиқ солиқ тўланган. Шундан 4,8 триллион сўмдан ортиғи, яъни 17,7 фоизи 20 та корхона ҳисобига тўғри келади. Уларга қўлланган солиқ имтиёзлари миқдори 3,7 триллион сўмни ташкил этган. Мазкур корхоналар орасида “Ўзбектелеком” АЖ (1,1 триллион сўм) ва Unitel МЧЖ ХК (842 миллиард сўм) энг кўп солиқ тўлаган.

Савдо соҳасидаги солиқ имтиёзлари

Ўтган йили савдо фаолияти билан шуғулланувчи 151 340 та корхона томонидан жами 20,3 триллион сўмга яқин солиқ тўланган. Шундан 1,8 триллион сўми, яъни 8,8 фоизи 20 та корхона ҳисобига тўғри келади. Мазкур 20 корхонага қўлланган солиқ имтиёзлари миқдори 759,1 миллиард сўмни ташкил этган. Компаниялар орасида солиқ тўлаш бўйича биринчиликни Anglesey Food МЧЖ ХК (208,8 миллиард сўм) эгаллаган.

Умумий овқатланишда солиқ имтиёзлари

2023 йил январь–декабрь ойларида умумий овқатланиш фаолияти билан шуғулланувчи 20 378 та юридик шахс томонидан 999,4 миллиард сўм солиқ тўланган. Шундан 170,7 миллиард сўми (17,1 фоизи) 20 та корхона ҳисобига тўғри келади. Уларга (20та корхонага) қўлланган солиқ имтиёзлари миқдори 26,3 миллиард сўмни ташкил этган. International Foodchain МЧЖ (59,8 миллиард сўм солиқ тўлаган) биринчиликни эгаллаган.

Ўрта корхоналарга солиқ имтиёзлари

Ўтган йилда 16 082 та ўрта тадбиркорлик субъекти томонидан 18,6 триллион сўмдан ортиқ солиқ тўланган. Шундан 563,3 миллиард сўми 20 та корхона ҳисобига тўғри келади. Уларга қўлланган солиқ имтиёзлари миқдори эса 29,1 млрд сўмни ташкил этган.

Кичик корхоналарга солиқ имтиёзлари

2023 йилда 64 272 та кичик бизнес корхонаси томонидан 10,9 триллион сўмдан ортиқ солиқ тўланган. Уларга қўлланган солиқ имтиёзлари 4,1 миллиард сўмни ташкил этган.