Мезбонларнинг аламли мағлубияти ва Йовович қайд этган ҳет-трик: “Навбаҳор”— “Сўғдиёна” ўйинидан фоторепортаж

Ўзбекистон суперлигасининг 20-туридан ўрин олган баҳсда Наманганнинг “Навбаҳор” жамоаси ўз майдонида Жиззахнинг “Сўғдиёна” клубини қабул қилди.

Ўйиннинг биринчи бўлимида ташаббус “Навбаҳор” томонида бўлса-да, мезбонлар юзага келган вазиятлардан фойдалана олмади. Йован Жокич, Азим Аҳмедов ва Жамшид Искандеров йўллаган зарбаларга аниқлик етишмади.

Натижада жамоалар танаффусга 0:0 ҳисобидаги дуранг билан чиқиб кетди. Иккинчи бўлимни ҳужумкор руҳда бошлаган Иван Бошкович шогирдлари 49-дақиқада ҳисобни очишга муваффақ бўлди: “Сўғдиёна”нинг черногориялик ярим ҳимоячиси Владимир Йовович тўпни дарвозага аниқ йўллади – 0:1.

Орадан 2 дақиқа ўтар-ўтмас, Владимир 20 метрлар чамаси узоқликдан аниқ ва кучли зарба йўллаб, ҳисобдаги фарқни оширди – 0:2.

Меҳмонлар 69-дақиқада ҳисобни янада йириклаштиришга эришди. Йовович эса бўш қолган дарвозани аниқ нишонга олиб, хет-трикка эришди ва якуний ҳисоб 0:3 кўринишини олишини таъминлади.

“Дарё” ушбу ўйиндан фотогалерея тайёрлади.