Бўстонлиқда иккита уй ёниб кетди (видео)

Тошкент вилояти Бўстонлиқ туманида иккита уй ёниб кетди. Бу ҳақда Фавқулодда вазиятлар вазирлиги ахборот хизмати хабар берди. 

Унга кўра, 26 сентябрь куни соат 22:23 да Тошкент вилояти, Бўстонлиқ тумани, “Чинор” МФЙ, Ширмонбулоқ кўчасида жойлашган уйларда ёнғин содир бўлаётгани тўғрисида ФВБга хабар тушган.

Ёнғин-қутқарув экипажлари соат 22:30 да ҳодиса жойига етиб бориб, соат 23:10 да қуршаб олинган ва соат 23:55 да ўчирилган. 

Ёнғин натижасида 2 та уйнинг тахминан 150 м² майдонда том ва ички қисми ёниб зарарланган. Оловни бартараф этишга 4 та ёнғин-қутқарув экипажи ва 3 та сув ташувчи автоулов жалб этилган.

Ҳодиса оқибатида тан жароҳати олган ва вафот этган фуқаролар тўғрисида хабар келиб тушмади. Ёнғин сабаби ва моддий зарар миқдори аниқланмоқда.

Бундан аввал 29 август куни соат 00:35 да ҳам Бўстонлиқ туманидаги ўрмон ер майдонларида ёнғин содир бўлганди. Ёнғин жойига 3 та ёнғин-қутқарув экипажи, 30 нафар қутқарувчи ҳамда Бурчмулло ўрмон хўжалигидан 20 нафар ходим жалб қилинган.