Хоразм вилояти Гурлан туманида эҳсон қутисидаги пулларни ўғирламоқчи бўлган эркак қўлга тушди. Бу ҳақда Миллий гвардия ахборот хизмати хабар берди.
Маълум қилинишича, 25 сентябрь куни соат 06:15 ларда Шовот тумани “Бешмерган” маҳалласида жойлашган “Юсуф Ҳамадоний” зиёратгоҳида хизмат олиб бораётган қўриқлаш ходими номаълум шахс томонидан зиёратгоҳга тегишли эҳсон қутисини очишга уринаётганини кўриб, жойида қўлга олган ва навбатчилик қисмига хабар берган.
Воқеа жойига етиб келган Шовот тумани қўриқлаш бўлими тезкор ҳаракатланувчи гуруҳ ходимлари томонидан ҳолат ўрганилганда, эҳсон қутисидаги пулларни ўғирламоқчи бўлган ушбу шахс Гурлан туманида яшовчи 33 ёшли М.М. экани маълум бўлган.
Ҳозирда мазкур ҳолат юзасидан туман ИИБ масъул ходимлари томонидан суриштирув ишлари олиб борилмоқда.
Бундан аввал Навоийда масжиддаги эҳсон қутиларидан салкам 5 млн сўм ўғирлаган шахс ушлангани ҳақида хабар берилганди. Шунингдек, Фарғонада эҳсон қутисини ўғирлаб кетганлар қўлга олинган эди.
Изоҳ (0)