SMBC Aviation Cаpital компанияси Uzbekistan Airways билан иккита Airbus A321neo самолёти учун янги лизинг шартномасини тасдиқланганини маълум қилди.
Самолётлар 2026 йилда Ўзбекистонга етказиб берилади.
Мазкур самолётлар Uzbekistan Airways учун янги турдаги самолёт бўлиб, авиакомпанияга Европа ва Жануби-Шарқий Осиёга йўналишларини кенгайтириш имконини беради.
“Ўзбекистон ҳаво йўллари Марказий Осиё минтақасида авиаташувлар бўйича етакчи бўлишни ўз олдига улкан мақсад қилиб қўйган. Йўналишлар тармоғини доимий равишда кенгайтириш, парвозлар сонини кўпайтириш ва уларни Airbus А320/А321 NEO оиласининг янги самолётларида самарали бошқариш режалаштирилган. Ушбу турдаги самолётлар қулай парвоз ва қизиқарли саёҳат учун зарур шарт-шароитларни таъминлашга ёрдам беради. Шубҳасиз, бу мақсадларнинг барчасига SMBC Aviation Cаpital’дан янги самолёт олиш туфайли эришамиз”, дейди Uzbekistan Airways бошқаруви раиси Шуҳрат Худайқулов.
SMBC Aviation Cаpital авиакомпаниясининг маркетинг бўлими раҳбари Конор Стаффорд Uzbekistan Airwaysъни SMBC Aviation Capital’нинг янги мижози сифатида кутиб олишдан мамнунлигини ҳамда кўп йиллик муваффақиятли ҳамкорликка тайёр эканини маълум қилган.
Бош қароргоҳи Дубльинда (Ирландия) жойлашган SMBC Aviation Cаpital дунёдаги энг йирик самолёт лизинг компанияларидан бири ҳисобланади. Компания юқори сифатли глобал авиакомпания мижозлар базасига эга бўлиб, портфелининг 83 фоизи тор корпусли самолётлар ва 66 фоизи янги технологияли самолётлардан иборат.
1000 дан ортиқ самолётлардан иборат паркка эга бўлган SMBC Aviation Cаpital кучли капитал позициясига эга ва S&P ва Fitch’да мос равишда А- ва BBB+ рейтингларига эга.
Изоҳ (0)