30 йил давомида ягона авиакомпания фаолият юритган Ўзбекистонда бор-йўғи уч йил ичида яна ўнта авиакомпания очилди.
Virgin Atlantic авиакомпанияси асосчиси, машҳур бизнесмен Ричард Бренсоннинг бир машҳур гапи бор: “Миллионер бўлмоқчи бўлсангиз, миллиард доллар пул билан авиакомпания очинг”.
Ўтган бир неча йил давомида, асосан коронавирус пандемияси туфайли, дунё бўйлаб 64 та авиакомпания касодга учраб, рекорд кўрсаткич қайд этилди. Шундай иқтисодий талафотлар, инвесторлар ўз пулларини йўқотиши даврида Ўзбекистон авиакомпаниялар ташкил этиш борасида олдинги ўринларда кетмоқда.
Марказий Осиёнинг аҳолиси энг кўп мамлакати бўлган Ўзбекистон уч йил ичида авиакомпаниялари сонини бирдан ўн бирга чиқарди. Бу ўн карра ўсиш охирги уч йил учун жаҳон рекорди бўлиши керак. Британиянинг ECA50 Plc компанияси Ўзбекистондаги фаол авиакомпанияларни таҳлил қилди.
Инфографикада Ўзбекистондаги фаол авиакомпаниялар, улардаги самолётлар сони, уларнинг хаби ва фаолият бошлаган йили кўрсатилган. Улардан учтаси давлат, олтитаси хусусий, биттаси чет эл капитали иштирок этган авиакомпаниялардир.
Кўплаб мамлакатлари депопуляциядан азият чекаётган Евроосиё минтақасининг юрагида жойлашган Ўзбекистон демографик ўсиш бўйича чемпион сифатида аҳолиси сонини 1990 йилдаги 20 миллиондан 2024 йилда 37 миллионга қадар қарийб икки баробар ўстирди. Лекин ўттиз йил давомида мамлакатда ягона миллий авиакомпания ва чекланган миқдорда чет эл ҳаво йўллари ширкатлари фаолият юритди.
Бугун янги авиакомпания, кўпроқ рақобат ва танлаш имкониятини кўриб кўз қувонади. Аслида Ўзбекистон минтақада авиация бўйича хабга айланиш учун кучли салоҳиятга эга. 37 миллион нуфусга эга мамлакат учун бир дона авиакомпания бўлишидек старт чизиғидан бошлаб, Ўзбекистон авиакомпаниялари сонини кўпайтириши орқали жаҳон трендига қўшилиши – мантиқий қадам. Ҳеч бўлмаганда, бугун ва келаётган бир неча йил учун шундай.
Лекин фуқаролик авиацияси соҳаси авиакомпания очган бизнесменларнинг бойлиги совурилиб кетиш ҳолатлари билан ном чиқарган.
Келаётган йилларда Ўзбекистондаги янги авиакомпанияларнинг иқтисодий ҳолати қандай бўлади? ECA50 Plc Ўзбекистон ҳамда Европа ва Марказий Осиё минтақасидаги авиалиниялар соҳаси ривожланишини кузатишда давом этади.
Саидазиз Аъзамов
ECA50 Plc компанияси таҳлилчиси
Изоҳ (0)