Қирғизистон Вазирлар Маҳкамаси раиси Оқилбек Жапаров давлат органларига 2024 йил охиригача барча уйларни суғурталашни топширди. Бу ҳақда Kloop хабар берди.
Жапаров 2024 йилда республикада содир бўлган селлар оқибатларини бартараф этиш масалаларига бағишланган йиғилишда шундай топшириқ берган. У хавф зонасида жойлашган уйлар ҳам суғурта қилиниши кераклигини айтган.
Бу табиий офатлар такрорланса, “фуқароларнинг молиявий ҳимоясини таъминлаш” ва уй-жойидан айрилган оилалар учун оқибатларни минималлаштириш имконини беради.
Вазирлар Маҳкамасида ҳали суғурталанмаган уйлар сони эълон қилинмади. Бироқ Қирғизистонда камида 55 мингта турар жой сел оқимлари таъсир қилиши мумкин бўлган ҳудудда жойлашган. Уларнинг қанчаси суғурта қилингани номаълум.
Суғурта одамларга табиий офатлардан кейин тезроқ тикланишга ёрдам берадиган ва давлат бюджетига юкни камайтирадиган муҳим воситага айланади. Вазирлар Маҳкамаси раҳбари глобал исиш туфайли табиий офатлар сони йилдан йилга ортиб боришини таъкидлади. Шу муносабат билан кўчмас мулкни суғурталаш, хавфсизликни таъминлашнинг зарурий чорасига айланиб бормоқда, дейилади Вазирлар Маҳкамаси хабарида.
Шунингдек, Жапаров маҳаллий аҳоли учун “фавқулодда вазиятларда қандай ҳаракат қилишни билиши учун” ахборот кампанияларини ташкил этишга топшириқ берган.
Қирғизистонда 2024 йил сентябрь ҳолатига кўра 331 та сел оқими қайд этилган. Натижада 5354 та уй зарар кўрган. Шундан 102 нафарига зарар етган, 138 нафари эса капитал таъмирга муҳтож.
Жорий йил содир бўлган селлар ва уларда ҳалок бўлганлар сони Қирғизистон учун рекордлардан бири бўлди. 2024 йилда селдан кейин жами 22 киши ҳалок бўлган, уларнинг аксарияти болалардир.
Изоҳ (0)