Қирғизистонда 18 август куни кучли ёмғир оқибатида Иссиқкўл вилоятига сел келди. Бу ҳақда мамлакат Фавқулодда вазиятлар вазирлиги хабар берди.
Оқсой қишлоғида тунда 30 та уйни сув босди, саккиз киши, жумладан, олти яшар бола эвакуация қилинди. Бундан ташқари, Булан Соготт, Темировка ва Корумду қишлоқларида ҳам сел кузатилди. Темировкада 100 дан ортиқ уйларнинг ҳовлиларини сув босди.
Ҳодиса жойига 80 дан ортиқ Фавқулодда вазиятлар вазирлиги қутқарувчилари, учта мотопомпа, учта экскаватор, тўртта юк ташувчи ва битта бульдозер юборилди. Сел оқибатларини бартараф этиш ишларига 300 дан ортиқ киши жалб қилинди. Сел оқими Булан Согот қишлоғидаги “Иссиқкўл Аврора” санаторияси ҳовлисига ҳам кириб борди.
Вилоятнинг Жети Огуз, Иссиқкўл ва Тон туманларида фавқулодда ҳолат эълон қилинди. ФВВ Фуқаро муҳофазаси штабининг вилоят йиғилиши бўлиб ўтганини маълум қилди. Сув тошқини оқибатларини бартараф этиш бўйича тезкор чоралар кўриш муҳокама қилинди. Қутқарувчилар ҳудудларни тозалаш ишларини давом эттирмоқда.
Изоҳ (0)