Ўзбекистонга ҳафтанинг иккинчи ярмида салқин ва нисбатан нам ҳаво кириб келади

“Ўзгидромет” иш ҳафтаси давомида қандай об-ҳаво кузатилиши ҳақида маълумот берди.

Унга кўра, уҳбу ҳафтанинг биринчи ярмида Ўзбекистон ҳудудининг катта қисмида қуруқ ва илиқ об-ҳаво сақланиб туради. Фақат 24—25 сентябрь кунлари Қорақалпоғистон Республикасида ва 25 сентябрда Хоразм вилоятида баъзи жойларда бир оз ёмғир ёғади.

Ҳафтанинг иккинчи ярмида республика ҳудудига Каспий денгизи ҳудудларидан бир оз салқин ва нисбатан нам ҳаво кириб келиши кутилмоқда.

26—27-сентябрь кунлари Фарғона водийси вилоятлари бўйича баъзи жойларда ёмғир ёғади. Тошкент, Самарқанд, Жиззах, Сирдарё вилоятларининг айрим жойларида 26 сентябрда бир оз қисқа муддатли ёмғир ёғиши мумкин.

Шарқий шамол йўналишини ўзгартириб, ғарбдан 7-12 метр/секунд тезликда эсади, 24—25 сентябрда шимолда ва чўл ҳудудларда, 26 сентябрда республика бўйича баъзи жойларда 13-18 метр/секундгача кучайиши, айрим жойларда чанг-тўзон билан кузатилиши мумкин.

Тошкентда асосан ёғингарчиликсиз об-ҳаво кузатилади, фақат 26 сентябрда бир оз қисқа муддатли ёмғир ёғиши мумкин. Ҳарорат асосан кечалари 14-17 даража, кундуз кунлари 23—25 сентябрда 28-31 даража, 26—27 сентябрда 24-27 даража бўлади. Шарқий шамол йўналишини ўзгартириб, ғарбдан 3-8 метр/секунд тезликда эсади, 25-26 сентябрда 10-12 метр/секундгача кучайиши мумкин.