Ўзбекистон ва Германия ўртасида меҳнат миграцияси соддалаштирилади

Ўзбекистон ва Германия ўртасида меҳнат фаолиятини амалга ошириш мақсадида вақтинча миграция рағбатлантирилади ва соддалаштирилади. Бу ҳақда Камбағалликни қисқартириш ва бандлик вазирлиги хабар берди.

Самарқандда ўтган Ўзбекистон—Германия олий даражадаги музокаралари натижасида бир қатор ҳужжатлар имзоланганди. Улар орасида “Миграция ва мобиллик соҳасида ҳар томонлама шериклик тўғрисида” ҳукуматлараро битим ҳам бор.

Вазирлик матбуот хизматининг маълум қилишича, мазкур битим 25 та моддадан иборат бўлиб, томонлар ўртасида қуйидаги соҳаларда ҳамкорлик ўрнатиш ва ривожлантиришни кўзда тутади:

• икки давлат ҳудудида меҳнат фаолиятини амалга оширишни мақсад қилган малакали мутахассислар, шу жумладан, талабалар ва касбий таълим олаётган шахслар ҳамда журналистлар ва олимларнинг адолатли мобиллигини рағбатлантириш;
• меҳнат фаолиятини амалга ошириш мақсадида вақтинча миграцияни рағбатлантириш ва соддалаштириш;
• касбий таълим ва малака ошириш сабабига кўра, ҳамда меҳнат фаолиятини амалга ошириш мақсадида давлатда узоқ муддат бўлишни рағбатлантириш;
• ноқонуний миграция ва мигрантларни ноқонуний олиб киришнинг олдини олиш ва уларга қарши курашиш;
• меҳнат эксплуатацияси, мажбурий меҳнат ва одам савдоси олдини олиш ва уларга қарши курашиш ҳамда жабрланувчиларни ҳимоя қилиш;
• икки давлат ҳудудида яшаш ёки кириш шартларини бажармаган фуқароларни қайтаришни соддалаштириш.

DPA ахборот агентлиги маълумотларида келтирилишича, Германияда 13 минг 700 нафар ўзбекистонлик бўлиб, уларнинг мутлақ катта қисми қонуний асосларда яшамоқда. 200 нафарга яқин шахс Ўзбекистонга депортация қилиниши кутилмоқда.

Самарқанд шаҳрида ўтган самарали музокаралар якунида Шавкат Мирзиёев ва Германия канцлери Олаф Шольц Қўшма декларацияни қабул қилди. Расмий ташриф доирасида 8 та икки томонлама ҳужжат имзоланди. Бундан ташқари, 2024—2026 йилларга мўлжалланган Технологик шериклик ва саноат кооперацияси дастури қабул қилинди, шунингдек, Ўзбекистон ва Германиянинг етакчи корхоналари даражасида бир қатор битим ва шартномалар тузилди.