Жорий йил I ярмида Ўзбекистон давлат қарзи қолдиғи 37 миллиард долларни ташкил этди. Бу ҳақда 5 сентябрь куни ўтказилган парламент йиғилишида иқтисодиёт ва молия вазири Жамшид Қўчқоров маълум қилди.
Жамшид Қўчқоровнинг айтишича, 2024 йилнинг дастлабки ярмида давлат қарзи ялпи ички маҳсулотнинг 33,2 фоизига тенг бўлган.
“Ҳисобот даврида давлат қарзининг қолдиғи қарийб 37 миллиард долларни ташкил этди. Шундан давлат ташқи қарзи 30,9 миллиард доллар, ички қарзи 6,1 миллиард долларга етган. Халқаро валюта жамғармаси ҳисоботига кўра, ҳозирда Ўзбекистон давлат қарзи мўтадил даражада. Жорий йил январь–июнь ойларида Ўзбекистон номидан давлат кафолати остида жами 2,8 миллиард долларлик ташқи қарз шартномалари имзоланган. Шунингдек, давлат бюджетини қўллаб-қувватлаш, жорий йилда сўндириладиган халқаро облигацияларни қайта молиялаштириш мақсадида жаҳон молия бозорларига 1,5 миллиард доллар миқдоридаги суверен халқаро облигациялар чиқарилди”, деди вазир мажлисда.
Иқтисодиёт ва молия вазирлиги ҳисоботига кўра, 2024 йил I чорагида мамлакат давлат қарзи 35,3 миллиард долларни ташкил этган. Шундан 29,4 миллиард доллари (83 фоиз) ташқи қарз, 5,9 миллиард доллари ички қарз (17 фоиз) бўлган. Дастлабки чоракда давлат қарзининг ялпи ички маҳсулотга нисбати 31,7 фоизга тенг эди.
Прогнозларга қараганда, мамлакат давлат қарзининг ялпи ички маҳсулотга нисбати 2024 йилда 37 фоиз, 2025 йилда 37,4 фоиз, 2026 йилда 37,9 фоиз атрофида бўлиши кутилмоқда. Шу билан бирга, 2024 йилда Ўзбекистон ялпи ички маҳсулоти ҳажми 100 миллиард доллардан, 2025 йилда 125 миллиард доллардан, 2026 йилда 140 миллиард доллардан ортиши тахмин қилинган.
Қонунчиликда давлат қарзи ялпи ички маҳсулотга нисбатан 60 фоизлик юқори чегараси белгиланган. Бунинг учун бюджет тақчиллигини 2024 йилда 4 фоиздан оширмаслик мақсад қилинган.
Изоҳ (0)