Ўзбекистонлик иш изловчиларнинг 31 фоизи яхши иш таклифи чиқиб қолса, чет элга кўчиб ўтишга тайёрлигини билдирди.
Охирги йилларда бу кўрсаткич 18 фоизга ошди, бу эса ўзбекистонликларнинг меҳнат миграциясига қизиқиши ортиб бораётганидан далолат беради. Ушбу маълумотлар халқаро таклифларга бўлган қизиқишнинг ортиб бораётганини кўрсатмоқда.
Қайд этилишича, бу ички меҳнат бозорига ҳам, давлат бандлик сиёсатига ҳам сезиларли таъсир кўрсатиши мумкин. Глобаллашув ва кадрлар учун рақобатнинг кучайиши шароитида ўзбекистонлик кўплаб мутахассислар мамлакатдан ташқарида касбий ва шахсий ривожланиш учун энг яхши шароитларни топишга интилмоқда.
Хорижга кетишнинг асосий сабаблари иқтисодий омиллар, янги тажрибага интилиш ва ҳаёт сифатини яхшилаш. Шу сабабли иш берувчиларга Ўзбекистонда юқори малакали кадрларни сақлаб қолиш учун рақобатбардош шароитлар яратиш муҳим.
Меҳнат миграциясига бўлган қизиқишнинг ортиши маҳаллий меҳнат бозори учун янги муаммоларни келтириб чиқараётгани айтилди. Иш берувчилар мутахассисларнинг хорижга кетишини камайтириш учун иш шароитлари ва карера ўсишини яхшилашга эътибор қаратиши керак.
Мамлакатда энг кўп бўш иш ўринлари чакана савдо, қурилиш, умумий овқатланиш, ишлаб чиқариш ва таълим соҳаларида шаклланишда давом этмоқда. Ўзбекистонда 2023 йил якуни бўйича жами иш билан банд бўлган аҳоли сони 312 минг кишига ошган. Жорий йил январь–март ойларида меҳнат бозоридаги бўш иш ўринлари сони қарийб 36,8 мингтани ташкил этиб, 2023 йил декабрь ойи кўрсаткичларига нисбатан 14 фоизга ошган.
2024 йилнинг биринчи чорагида республикада иш ҳақининг номинал ўсиш суръати йиллик 19,8 фоизни, инфляцияни ҳисобга олган ҳолда эса 9,8 фоизни ташкил этган. Хусусан, савдо (24,4 фоизга) ҳамда ахборот ва алоқа (23,5 фоизга) соҳаларида юқори кўрсаткичлар сақланиб қолган. Қурилиш соҳасида меҳнат ресурслари таклифининг ўсиши ҳисобига иш ҳақи ўсиши пастроқ шаклланмоқда (6,6 фоиз).
Изоҳ (0)