Рақобатни ривожлантириш ва истеъмолчилар ҳуқуқларини ҳимоя қилиш қўмитаси талабаларни бир йил давомида лицензияси йўқ таълим йўналишида ўқитиб келган Akfa университетига нисбатан иш қўзғатди.
![](/static/2024/09/04/photo_2024-09-04_14-50-33-RF3x6V-J.jpg)
Қўмитага ушбу университетнинг Commercial Law (Тижорат ҳуқуқи) йўналишида бир йил ўқиган ва кейинги йилдан ушбу йўналишда ўқиш тўхтатиб қўйилгани, тўланган пуллар қайтариб берилмаётгани тўғрисида 10 га яқин мурожаат келиб тушган.
Мазкур мурожаатлар бўйича ўтказилган таҳлилларга кўра, 2022 йил 10 январда турли ОАВда Akfa университетига 2022/2023-ўқув йили учун қабул бошлангани тўғрисида реклама ахборотлари жойлаштирилган ҳамда рекламаларда абитуриентлардан ҳужжатларни қабул қилиш, шунингдек Тижорат ҳуқуқи таълим йўналиши учун ҳам давом этаётгани баён қилинган.
Университетга нодавлат олий таълим хизматларини кўрсатиш учун берилган лицензияда рухсат этилган таълим йўналишларида Тижорат ҳуқуқи мавжуд эмаслигига қарамасдан, мазкур йўналишда ўқитиш учун 2022/2023-ўқув йилида талабалар ўқишга қабул қилинган ва 4 йиллик (8 та семестр) ўқиш учун оммавий оферта шартномаси тузилган.
Талабалар 12,5 миллион сўмдан 25 миллион сўмгача контракт тўловини тўлаган (қўмитага келиб тушган 7 та мурожаатлар бўйича қайта ҳисоб-китоб қилинмаган жами маблағ миқдори 167 миллион 500 минг сўм).
Ўқиш маълум бир муддат давом этган. 2023 йил август ойида талабаларга Тижорат ҳуқуқи йўналишида ўқитиш учун лицензия берилмагани сабабли кейинги 2023/2024-ўқув йилини вақтинчалик гибрид шаклида давом эттириш ёки Халқаро бизнес таълим йўналишида ўқиш таклиф қилинган. Аксарият талабалар бу таклифни рад этган ва айримлари бошқа таълим йўналишида ўқишга рози бўлган. Бироқ университет томонидан бугунги кунга қадар кўрсатилмаган хизмат учун олинган контракт пуллари фуқароларга қайтариб берилмаган.
Мазкур ҳолатлар бўйича Central Asian University МЧЖ томонидан “Истеъмолчиларнинг ҳуқуқларини ҳимоя қилиш тўғрисида”ги қонуннинг 4-,7-,12-, 19-, 21-моддалари талаблари бузилган.
Қўмита қонунбузилиш ҳолатларини бартараф этиш ва келгусида йўл қўймаслик, кўрсатилмаган хизмат учун 7 нафар талабага жами 167 миллион 500 минг сўм маблағни қайта ҳисоб-китоб қилиш, шунингдек, бошқа фуқароларнинг мурожаати асосида улар билан тегишли қайта ҳисоб-китобларни амалга ошириш юзасидан кўрсатма берди.
Изоҳ (0)