Қашқадарё вилоятининг Қарши туманида яшовчи 36 ёшли эркак Бобур Шералиев якшанба куни ишга чақирилиб, уйига ўлик ҳолда қайтди. Бу ҳақда “Менинг юртим” телеканалининг “Марказий студия” кўрсатувида маълум қилинди.
“Эгаси бўлганимиздан сўнг унинг бирор жойи оғриганда, мазаси қочганда боришимиз керак эди-ку, бизни ҳеч ким чақирмади-да”, — дейди марҳумнинг яқинларидан бири.
Маълум қилинишича, уч фарзанднинг отаси 12 йилдан бери Қарши шаҳар Ободонлаштириш бошқармасида ишлаб келган 36 ёшли Бобур Шералиев 2023 йилнинг 18 июнь, якшанба куни ишга чақирилган.
“Шоира деган опа бор. У ҳар куни эрталаб 05:30 ларда телефон қиларди. Ўша куни ҳам телефон қилиб, Бобур кел деб телефон қилди. Кейин чиқиб кетди. Аслида шанба, якшанба дам куни, аммо дам йўқ эди”, — дейди марҳумнинг хотини Зубайда Иноятова.
Зубайда Иноятова.
Марҳумнинг ўлими ҳақида унинг акасига ўзини Қарши шаҳар прокуратураси терговчиси деб таништирган ходим ўша куни соат 17:00 дан 18:00 гача бўлган вақт оралиғида телефон орқали хабар берган.
“Нима сабабдан вафот этибди десам, иссиқда юраги тўхтаб қолибди, деди. Поччам телефон қилиб, ток уриб ўлибди деди. Шунда дўхтирларга ток урибди-ку, десам дўхтирлар бир-бирига қараб, булар билиб қолибди-ку, дейишди. Кейин хулосани бошқача беришди”, — дейди марҳумнинг акаси Бекзод Шералиев.
Журналист Ғолиб Амиров суриштирувлари якунида марҳумнинг вафотига фаввораларда техник ишларни олиб бораётган пайтдаги ток уриши сабаб бўлиши мумкинлигини айтади.
Қўшимча қилинишича, телеканал сўровига жавобан вилоят прокуратураси воқеа юзасидан Қарши шаҳар прокуратураси томонидан терговга қадар текширув ҳаракатлари олиб борилаётганини билдирган.
Изоҳ (0)