Сиёсий партиялар 27 октябрь куни бўлиб ўтадиган сайловларга фаол тайёргарлик кўрмоқда. Партия етакчилари ўз чиқишлари орқали соҳаларни ривожлантириш муаммоларига тўхталиб ўтмоқда.
Ўзбекистон Либерал-демократик партияси раиси Актам Хаитовга кўра транспорт ва йўл қурилиш соҳалари ислоҳотларга муҳтож. Хусусан, ЎзЛиДеП етакчиси:
“Транспорт вазирлиги, Автомобиль йўллари давлат қўмитаси соҳада кўп ўзгаришлар қилиши зарур. Соҳада рақобат йўқлиги боис, хизмат кўрсатиш сифати паст. Нархлар юқори ва йўловчилар учун шароитлар етарли эмас”, дея қайд этди.
Ўз навбатида, бу камчиликларни мамлакатнинг туризм салоҳиятига салбий таъсири нуқтайи назаридан баҳолаб ўтди.
Буни хорижий туристлар ва ўзимизни фуқаролар ҳам бир неча бор танқид қилиб чиқди. Янги йўллар тезда таъмирталаб бўлиб қолмоқда, тирбандликлар муаммоси ҳалигача ўз ечимини топмаган.
Муаммолар ҳақида сўз юритганда, либералларнинг электорати бўлмиш фермерлар муаммоларига ҳам тўхталиб ўтди.
Жумладан, партия раиси “қишлоқ хўжалиги соҳасида эркин бозор муносабатларига ўтилган бўлса-да, ички ишлар органлари ва маҳаллий ҳокимликлар улар фаолиятига аралашишни тўхтатмаётгани дилни бир оз хира қилади”, дея фикр билдирди.
Мисол сифатида ғалла ўрими мавсумида Қашқадарё вилоятининг Кўкдала туманида бўлиб ўтган воқеани эслаган ҳолда, Ички ишлар вазирлиги бундай вазиятларни чуқур ўрганиб, уларга ҳуқуқий баҳо беришига ишонч билдирди.
Юқорида кўтарилган муаммолар либералларнинг сайловолди дастуридан жой олишини сезиш мумкин. Қолаверса, фермерлар ҳуқуқларини ҳимоя қилишга қаратилган қонунлар ҳам сайловолди платформасининг муҳим масалаларидан бирига айланишини кутиш мумкин.
Изоҳ (1)
Iltimos shu partiyalar o'zlarini saylash vaqti kelishidan avvalroq ham korinish berishlariga imkon bering. Shuncha gaplari bor ekan ichida. Yig'ilib ketgan ekan barchasida. Endi gapirishayapti. Buncha qiyin o'y fikrlar bilan bir saylovdan ikkinchi saylovgacha yurish oson emas