2024 йил 27 август куни XXXIII ёзги Олимпия ўйинлари ғолиблари билан учрашувда Қосим-Жўмарт Тўқаев Қозоғистон спортидаги коррупция ва хорижий спортчиларни терма жамоа сафига жалб қилиш ҳақида гапирди, Бу ҳақда “Sports.kz” хабар бермоқда.
Президентнинг сўзларига кўра, Париждаги мусобақалар Олимпия спорт турларини доимий қўллаб-қувватлаш муҳимлигини кўрсатди.
Қозоқ спортчиларининг баъзилари шоҳсупага бир неча қадам қолганда ўз юришини тўхтатиб, кучли ўнликдан жой олди. Бу эса спортчиларнинг ғолибликка бўлган курашидан дарак беради. Бироқ президентнинг фикрича, профессионал спортда ҳал қилиниши керак бўлган кўплаб жиддий муаммолар тўпланиб қолган.
“Давлатимиз томонидан юқори савиядаги спортчиларни тайёрлаш учун етарли миқдорда маблағ ажратмоқда. Шу боис фуқароларимиз спортчиларимиздан халқаро мусобақаларда катта ютуқларни кутишади. Олимпия спорт турлари бўйича кенг қамровли ислоҳотларни амалга ошириш муддати кечикмоқда, бунинг учун ваколатли вазирлик, Миллий олимпия қўмитаси ва спорт федерациялари томонидан мувофиқлаштирилган ҳаракатлар амалга оширилиши, спортда ҳалол рақобат руҳи ҳукмрон бўлиши ҳамда коррупцияга қарши қатъий курашиш зарур”, деди давлат раҳбари.
Қосим-Жўмарт Тўқаев спорт соҳасига юқори малакали мутахассисларни жалб қилиш учун энг қулай шарт-шароитларни яратиш зарурлигини таъкидлади.
“Афсуски, кўплаб иқтидорли мураббийлар ўз ватанида имкон топа олмай хорижга кетишади. Улар у ерга бориб, ёш спортчиларни тарбиялайди, бошқа давлатларнинг терма жамоаларини жаҳон мусобақаларига тайёрлайди. Жумладан, яқинда бўлиб ўтган Олимпия ўйинларида қозоғистонлик мураббий Эсбол Султонов бошчилигидаги Тунис таэквондо терма жамоаси иккита медални қўлга киритди, улардан бири олтин. Мураббийларни ҳар томонлама қўллаб-қувватлаш чораларини кўриш, уларнинг ижтимоий ва касбий мавқейини ошириш, айниқса, муҳим аҳамиятга эга. Бир сўз билан айтганда, кучли мураббийлар мактабини яратишимиз керак”, деди Қозоғистон президенти.
Президент чет эллик спортчиларни фуқароликка қабул қилиш амалиётидан воз кечиш зарурлигини билдирди.
“Ахир, ҳар қандай хорижлик спортчи, ёш ва истиқболли спортчиларимизни терма жамоамизга аъзоликдан маҳрум қилади. Шу билан бирга, ҳозирда биздаги муаммоли спорт турларига кучли хорижлик мураббийларни жалб этиш имкониятларини кўриб чиқиш мақсадга мувофиқдир. Легионер спортчиларнинг ютуқлари узоқ муддатли муваффақиятни таъминлай олмайди, бу ерда профессионал мураббийлик ёндашуви муҳим”, деди Президент Тўқаев.
Эслатиб ўтамиз, Қозоғистон фуқаролигига қабул қилинган россиялик спортчилар 2024 йилги Олимпия ўйинларида мамлакат шарафини ҳимоя қилиши керак эди. Аммо Елена Рыбакина ва Юлия Путинцева жароҳати сабаб Париждаги мусобақада иштирок этишдан бош тортди.
Париж Олимпиадасида Қозоғистон делегацияси 1 та олтин, 3 та кумуш ва 3 та бронза медали билан умумжамоа ҳисобида 43-ўринни эгаллади.
Изоҳ (0)