2024-yil 27-avgust kuni XXXIII yozgi Olimpiya o‘yinlari g‘oliblari bilan uchrashuvda Qosim-Jo‘mart To‘qayev Qozog‘iston sportidagi korrupsiya va xorijiy sportchilarni terma jamoa safiga jalb qilish haqida gapirdi, Bu haqda “Sports.kz” xabar bermoqda.
![](/static/2024/08/28/daa-8177-2_mediumThumb-wuR8_pAZ.jpg)
Prezidentning so‘zlariga ko‘ra, Parijdagi musobaqalar Olimpiya sport turlarini doimiy qo‘llab-quvvatlash muhimligini ko‘rsatdi.
![](/static/2024/08/28/1724744650_KZ3_7879_2-OrQjMsFI.jpg)
Qozoq sportchilarining ba’zilari shohsupaga bir necha qadam qolganda o‘z yurishini to‘xtatib, kuchli o‘nlikdan joy oldi. Bu esa sportchilarning g‘oliblikka bo‘lgan kurashidan darak beradi. Biroq prezidentning fikricha, professional sportda hal qilinishi kerak bo‘lgan ko‘plab jiddiy muammolar to‘planib qolgan.
“Davlatimiz tomonidan yuqori saviyadagi sportchilarni tayyorlash uchun yetarli miqdorda mablag‘ ajratmoqda. Shu bois fuqarolarimiz sportchilarimizdan xalqaro musobaqalarda katta yutuqlarni kutishadi. Olimpiya sport turlari bo‘yicha keng qamrovli islohotlarni amalga oshirish muddati kechikmoqda, buning uchun vakolatli vazirlik, Milliy olimpiya qo‘mitasi va sport federatsiyalari tomonidan muvofiqlashtirilgan harakatlar amalga oshirilishi, sportda halol raqobat ruhi hukmron bo‘lishi hamda korrupsiyaga qarshi qatʼiy kurashish zarur”, dedi davlat rahbari.
![](/static/2024/08/28/1724744716_KZ4_7738_2-CpXXn81I.jpg)
Qosim-Jo‘mart To‘qayev sport sohasiga yuqori malakali mutaxassislarni jalb qilish uchun eng qulay shart-sharoitlarni yaratish zarurligini ta’kidladi.
“Afsuski, ko‘plab iqtidorli murabbiylar o‘z vatanida imkon topa olmay xorijga ketishadi. Ular u yerga borib, yosh sportchilarni tarbiyalaydi, boshqa davlatlarning terma jamoalarini jahon musobaqalariga tayyorlaydi. Jumladan, yaqinda bo‘lib o‘tgan Olimpiya o‘yinlarida qozog‘istonlik murabbiy Esbol Sultonov boshchiligidagi Tunis taekvondo terma jamoasi ikkita medalni qo‘lga kiritdi, ulardan biri oltin. Murabbiylarni har tomonlama qo‘llab-quvvatlash choralarini ko‘rish, ularning ijtimoiy va kasbiy mavqeyini oshirish, ayniqsa, muhim ahamiyatga ega. Bir so'z bilan aytganda, kuchli murabbiylar maktabini yaratishimiz kerak”, dedi Qozog‘iston prezidenti.
Prezident chet ellik sportchilarni fuqarolikka qabul qilish amaliyotidan voz kechish zarurligini bildirdi.
“Axir, har qanday xorijlik sportchi, yosh va istiqbolli sportchilarimizni terma jamoamizga a’zolikdan mahrum qiladi. Shu bilan birga, hozirda bizdagi muammoli sport turlariga kuchli xorijlik murabbiylarni jalb etish imkoniyatlarini ko‘rib chiqish maqsadga muvofiqdir. Legioner sportchilarning yutuqlari uzoq muddatli muvaffaqiyatni ta’minlay olmaydi, bu yerda professional murabbiylik yondashuvi muhim”, dedi Prezident To‘qayev.
Eslatib o‘tamiz, Qozog‘iston fuqaroligiga qabul qilingan rossiyalik sportchilar 2024-yilgi Olimpiya o‘yinlarida mamlakat sharafini himoya qilishi kerak edi. Ammo Yelena Ribakina va Yuliya Putinseva jarohati sabab Parijdagi musobaqada ishtirok etishdan bosh tortdi.
Parij Olimpiadasida Qozog‘iston delegatsiyasi 1 ta oltin, 3 ta kumush va 3 ta bronza medali bilan umumjamoa hisobida 43-o‘rinni egalladi.
Izoh (0)