Лионель Мессига Саудия Арабистони клуби қанча маош таклиф қилгани маълум бўлди

“Ал-Ҳилол” ўтган мавсумда аргентиналик ҳужумчи Лионель Мессига рекорд даражадаги шартнома таклиф қилган.

Fox Sports Аргентина ижтимоий тармоқларда хабар беришича, Саудия Арабистонида аргентиналик футболчи ҳафтасига 15–20 миллион евро маош олиши мумкин бўлган. 37 ёшли футболчининг йиллик даромади бонуслар билан бирга 1 миллиард еврога етиши мумкин эди.

Саудиянинг “Ан-Насср” клубида ўйнаётган Роналду йилига 175 миллион фунт (200 миллион евро) маош олади.

Маълумот учун, Месси 2023 йилнинг ёзидан буён “Интер Майами” клубида ўйнамоқда. Бу даврда у барча турнирларда 29 та учрашувда қатнашиб, 25 та гол ва 16 та голли узатмани амалга оширган. Футболчининг клуб билан амалдаги меҳнат шартномаси 2025 йил охиригача амал қилади.

Футболчининг базовий маоши йилига 12 миллион долларни ташкил этади, шунингдек, кафолатланган компенсация эса 20,4 миллион бўлади. 

Қайд этиб ўтиш жоиз, бу нархлар ичига Adidas ва Apple TV берадиган тўловлар кирмайди — улар ҳам ҳисобга олинса, Месси йилига 50-60 миллион доллар олади.

Transfermarkt порталида берилган маълумотларга кўра, футболчининг бозор қиймати 30 миллион еврони ташкил қилади.