Шу кунларда Россиянинг турли ҳудудларида қаровсиз қолиб кетган 31 нафар бола Ўзбекистонга қайтарилди, деб хабар бермоқда болалар омбудсмани.
Маълум қилинишича, болалар омбудсмани ўзининг хорижий ҳамкасби — Россия Болалар омбудсмани М.Лвова-Беловага юборган сўровида қаровсиз қолдирилган вояга етмаган болаларни ҳозирда Ўзбекистонга қайтариш чоралари кўрилаётгани, Ўзбекистон масъул идоралари вакиллари томонидан болаларни ватанга қайтарилгунга қадар, уларни ҳозирда Россияда яшаб турган ҳудудларидаги болалар муассасаларида вақтинча жойлаштирилишида тезкор амалий ёрдам сўраган.
Ўзбекистон Болалар омбудсмани сўровига кўра, Россия Болалар омбудсманининг тезкор чоралари натижасида мазкур масалада зарур кўмак кўрсатилди ва улар жойлашган ҳудудларда болалар учун қулай ва муносиб шарт-шароит таъминланди.
25 август куни 9 нафар бола, бундан аввал 22 нафар бола (13 нафари — Санкт-Петербург шаҳридан, 9 нафари — Москва шаҳридан, 8 нафари — Новосибирск шаҳридан, 1 нафари — Қозон шаҳридан олиб келинган) Ички ишлар вазирлиги вакиллари ҳамроҳлигида қайтарилди.
Аввалроқ Малайзияда қийин аҳволда қолган ўзбекистонлик 14 ёшли бола ватанга қайтарилгани ҳақида хабар берилганди.
Изоҳ (0)