Ўзбекистон ва Озарбайжон президентлари 23 августдаги музокаралар якунида ОАВ вакиллари билан учрашув ўтказиб, ўз фикрларини билдирди.
Президент матбуот хизматининг маълум қилишича, Шавкат Мирзиёев Озарбайжон президентининг Ўзбекистонга давлат ташрифи икки мамлакат ўртасидаги кўп асрлик дўстона муносабатларни ривожлантиришда тарихий воқеа бўлганини таъкидлади.
Шавкат Мирзиёев ташрифнинг асосий натижаларидан бири сифатида Иттифоқчилик муносабатлари тўғрисидаги шартномани алоҳида қайд этди. Бу, Ўзбекистон етакчиси таъкидлаганидек, давлатлараро ҳамкорликни мустаҳкамлашда янги саҳифа очилганини англатади ва томонларнинг кўп қиррали шерикликни ҳар тарафлама ривожлантиришга қатъий содиқлигини тасдиқлайди.
Таъкидланишича, Ўзбекистон қардош Озарбайжоннинг улкан ютуқларидан хурсанд.
Давлат раҳбари қардош мамлакатда иқтисодиёт, саноат жадал ривожланиб, аҳоли турмуш даражаси яхшиланаётганини таъкидлади. Илҳом Алиевни Озарбайжоннинг ҳудудий яхлитлиги тиклангани ва азалий Озарбайжон ерлари қайтарилгани билан яна бир бор муборакбод этди.
Ижтимоий инфратузилма ва ишлаб чиқариш объектлари фаол қурилаётган Қорабоғ қайта тикланаётганига алоҳида эътибор қаратилди. Ўзбекистон Озарбайжонни бу олижаноб ишда бундан буён ҳам қўллаб-қувватлашга тайёр.
“Озарбайжон бизнинг муҳим стратегик ҳамкоримиз ва иттифоқчимиздир. Бизни муштарак тарихий илдизларимиз ва кўп асрлик дўстлигимиз, ягона дин, ўхшаш маданият ва анъаналар боғлаб туради. Буларнинг барчаси ҳар томонлама ҳамкорликни чуқурлаштириш учун ишончли пойдевор бўлиб хизмат қилмоқда”, деди Шавкат Мирзиёев.
Музокаралар чоғида президентлар кўп қиррали муносабатларнинг барча йўналишларини, жумладан, савдо, саноат кооперацияси, энергетика, транспорт, қишлоқ хўжалиги ва маданият соҳаларини муҳокама қилди.
Томонлар сиёсий мулоқотни мустаҳкамлаш, кўп томонлама платформаларда ўзаро қўллаб-қувватлаш, парламентлар, ҳукуматлар, тармоқ идоралари ва ҳудудлар даражасида фаол алоқаларни давом эттиришга келишиб олди.
Барқарор ўсиш суръатларини намоён этаётган савдо-иқтисодий ҳамкорликни кенгайтириш муҳимлиги таъкидланди. Шу муносабат билан 2025 йилни Ўзбекистон ва Озарбайжон ўртасидаги иқтисодий кооперация йили деб эълон қилиш ҳамда 20 та асосий йўналиш бўйича дастур қабул қилишга аҳдлашилди.
Куни кеча бизнес форуми самарали ўтгани, унда ўнлаб шартнома ва битимлар имзолангани қайд этилди. Ушбу келишувлар доирасида меҳмонхона, тўқимачилик кластерлари, тикувчилик фабрикасини барпо этиш, қурилиш материалларини ишлаб чиқариш каби муҳим лойиҳалар амалга оширилади.
Транспорт боғлиқлигини, шу жумладан Транскаспий йўлагини ривожлантиришга алоҳида эътибор қаратилди.
Етакчилар “яшил” энергия ишлаб чиқариш ва уни Озарбайжон орқали Европа мамлакатларига экспорт қилиш бўйича кенг кўламли минтақавий лойиҳани амалга оширишни тезлаштиришга келишиб олди.
Ҳудудлар ўртасидаги алоқаларни фаоллаштириш мақсадида бу бўйича “йўл харитаси” қабул қилинади, шунингдек, Қўқон шаҳрида навбатдаги ҳудудлар форуми ўтказилади.
Изоҳ (0)