Азия Инвест Фаворит МЧЖ — бу ном сизга жудаям таниш тўғрими? Топдингиз, айнан шу МЧЖ раҳбари Тошкент шаҳри Яшнобод тумани Иззат кўчасида қурилиши режалаштирилган кўп қаватли уйлардан квартира сотиб олиш бўйича шартнома тузган мингдан ортиқ фуқароларни алдаб, салкам 164 миллиард сўмга чув туширганди. Ҳолат юзасидан ўша пайтнинг ўзида зудлик билан Вазирлар Маҳкамасининг тегишли фармойиши чиқарилиб, Иззат турар жой мажмуасидан уй сотиб олмоқчи бўлиб, алданиб қолган фуқароларнинг муаммосини ўрганиш ва уларни бартараф этишга қаратилган таклифлар тайёрлаш бўйича Ҳукумат комиссияси тузилганди. Айни кунга келиб, айнан шу қурилиш ташкилотидан жабр кўрганларга Ийк ота массивидан янги хонадонлар қуриб берилди.
“Дарё”га Тошкент вилоятининг Чирчиқ шаҳридан мурожаат қилганларнинг айтишича, улар ҳам айнан Азия инвест Фаворит МЧЖдан жабрланган. 174 нафар киши уй учун пул тўлаб қўйиб, 3 йилдан бери уй қурилиши давом этишини кутмоқда.
2021 йил декабрь ойида уй-жой қурилиши бўйича Тошкентда кўпчиликни алдаб, жамоатчиликка яхши танилган қурувчи-тадбиркор Хайрулла Ҳатамовнинг яна бир ташкилоти “Halal Golden Meat” масъулияти чекланган жамияти билан шартнома имзолаганмиз. Орадан уч йил муддат ўтган бўлса-да, уйимиз ҳамон котлован ҳолатида турибди. 2023 йилнинг июль ойида Тошкент шаҳрининг Яшнобод туманидаги Иззат кўчасида уй оламан деб пул тўлаб алданиб қолган одамларнинг кўчага чиқишига Бош вазиримиз томонидан эътибор қаратилди. Алданиб қолганлар учун уйлар қурилиб, топширилди ҳам. Лекин биз ҳам айнан Хайрулла Ҳатамов томонидан алдандик. Шунга қарамасдан барибир эътибордан четда қолиб кетдик, — дейди янги хонадон учун пул тўлаб, куйиб қолаётган мурожаатчи Садоқат Раманова.
Мурожаатчининг айтишича, “Halal Golden Meat” масъулияти чекланган жамияти қуришни бошлаган бинодаги сотув офисида бўлган Жавлон, Ҳожиакбар исмли ходимларнинг мижозлар билан банкка қўшилиб бориши, имкон қадар пулни тезроқ тўлатишга уриниши уларнинг гумонланишига сабаб бўлган.
Бош вазиримиз бошчилигидаги комиссия тузилиб, Яшнободдаги воқеа назоратга олингач, бизда ҳам ишонч пайдо бўлди. Демак эътибор қаратишади, Чирчиқдагилар муаммосини ҳам ҳал қилишади деб ўйладик. Лекин ҳозиргача ҳеч қандай натижа йўқ. Энг ёмони биз қилган мурожаатларга ҳам жавоб беришмаяпти, — дейди мурожаатчи.
“Иттифоқ” маҳалласида қад ростлаётган кўп қаватли уйдаги хонадонларнинг бирига пул тўлаган Ҳусниддин Шодмоновнинг айтишича, қурувчи улар пул тўлаган уй 2023 йилнинг биринчи чорагида фойдаланишга топширилишини айтган.
2023 йил уй битади дейишганди. Мана 2024 йилнинг сентябрь ойи келяптики, лекин уйимиз ҳалиям котлован ҳолатида турибди. Хайрулла Ҳатамов каби тадбиркорлар президентмиз сиёсатига қарши чиқяпти-ку. Нега тадбиркорларга яратилаётган имкониятни суистеъмол қилишяпти?, — дейди Ҳусниддин Шодмонов.
Суҳбатдошнинг айтишича, мазкур уйдаги хонадонлар учун тўлов қилганлар орасида уйини сотиб тўлов қилгани учун ижарада яшаётганлар, кўч-кўронини танишларининг уйига қўйиб, хонадони қурилиши битишини кўзи тўрт бўлиб кутаётганлар бор.
Мурожаатимиз юқоридаги раҳбарларга етиб боришини, одамларни алдаётган тадбиркорларни тартибга чақиришса деган умидимиз бор. Зора 2024 йил якуни билан уйимиз қурилиши бица ва одамларнинг кўнгли хотиржам бўлса, — дейди у.
Яна бир алданган фуқаро Машҳура Жалилованинг айтишича, ушбу янги хонадонлар қурилаётгани ҳақидаги хабарни у ҳокимият биносида реклама қилишганида кўриб, ишонган.
2021 йилнинг октябрь ойида 3 хонали хонадонга тўлов қилгандик. Ўша пайтда акция кетяпти, ҳатто бошланғич тўловни ҳам бўлиб-бўлиб тўлашингиз мумкин дейишганига, уларга ишониб, тўлов қилгандик. Бугунги кунга келиб, анча пулга куйиб ўтирибмиз. Алдандик. Мурожаат қилмаган жойимиз қолмади. Ҳеч ким бизни эшитмаяпти, ёрдам бермаяпти, — дейди жабрланувчи Машҳура Жалилова.
Дилафрўз Камолова исмли яна бир жабрланувчининг айтишича, айнан шу 9 қаватли уйдан хонадон олиш учун тўлов қилганлар 174 кишини ташкил этади.
«Аёл бошипм билан уч нафар фарзандимни ташлаб, Россияга бориб ишлаб, йиғган пулимни уйга тўлагандим. Етмаганига банклардан биридан кредит олиб, қўшиб тўладим. Биз ҳали қурилиши бошлансада давом этмаётган уйимга кредит тўлаб келяпман. Бу ҳақда ҳокимиятга, ҳатто Бош прокуратурага мурожаат қилдик. Лекин натижа йўқ», — дейди жабрланувчи.
Янги хонадон учун 60 миллион сўм тўлаган Маҳфуза Музропованинг билдиришича, у алданганини сезгач, пулини қайтариб олишга ҳаракат қилган. Аммо қурувчи томон на пулни қайтарган на қурилишни давом эттирган.
Яна бир суҳбатдош Олмосхон Нишонбоева эса янги хонадон учун 55 миллион сўм тўлаганини, айни кунга келиб, пулга куйиб қолаётганини, ҳеч қайси ташкило уларнинг муаммосига эътибор қаратмаётганини билдирмоқда.
Тўрт нафар болам бор. Ойига 200 доллар тўлаб, ижарада яшаб келамиз. Жудаям қийналиб кетдик. Ногирон фарзанд боқиш мушкул иш. Энг ёмони мана бундай алданиб қоляпмиз. Бизга ҳеч ким ёрдам бермаяпти, — дейди жабрланувчи аёллардан яна бири.
Бир хонали уйини сотиб, икки хонали хонадонга тўлов қилган фуқаронинг айтишича, қурувчи фуқароларга тайёр хонадонларга ётоқхона мебелларини ҳам қўшиб топширамиз дея алдаган.
Ўша пайтда бу уйдан олдин битадиган уйларни ҳам кўргандик. Маҳаллада бунақа янги уйлар кўп қурилаётганди. Лекин айнан шу қурувчининг одамларига алдандик. Улар янги хонадонларга ўзимизнинг ҳисобимиздан ётоқхона мебел ҳам қўшиб берамиз деб, бизни алдашди. Ишониб, пулимизни топшириб ўтирибмиз-да. Мана бугунги кунга келиб, алданиб қолдик, — дейди у.
Мурожаатчиларнинг айтишича, шу кўп қаватли уйлардаги хонадонга тўлов қилиб, алданиб қолган ўқитувчи аёл айни кунда жудаям сарсон бўлмоқда.
Ўзи ўқитувчи, эри Россияда ишлаб келади. Бор пулини уйга тўлов қилиб, бугунги кунда юкларини ҳамкасбларининг уйига бўлиб-бўлиб сақлаб келяпти. Тасаввур қиляпсизми уйидаги анжомларини бировларнинг уйига бўлиб-бўлиб қўйиб, ўзи сарсон-саргардонликда яшаб келмоқда. Виждонсиз қурувчилар буни ҳис қилмайди. Биз муттаҳамлик, ўғрилик қилиб, ўша пулни топганимизда ачинмасдик. Пешона теримиз билан топилган пулларимизга ачиняпмиз, — дейди жабрланувчилар.
Бош пудратчи “Halal Golden Meat” экани айтилаётган қурилиш паспортида келтирилишича, “Янги Ўзбекистон” массивида 2 та 7 қаватли, 1 та 9 қаватли, 4 та 12 қаватли ва 3 та 16 қаватли уйлар қурилиб, жами 492 нафар фуқаро янги хонадонли бўлиши режалаштирилган. Шулардан фақатгина 2 та 7 қаватли уй фойдаланишга топширилган.
“Дарё” мавзуга қайтади.
Изоҳ (0)