Қорақалпоғистонда ўтган йиғилишда президент Шавкат Мирзиёев азалдан дўст-қардош, оға-ини, қуда-анда бўлиб яшаётган ўзбек ва қорақалпоқ оилаларининг тинч ва фаровон, бахтли ҳаётини таъминлаш асосий мақсад эканини таъкидлади.
“Кўриб турибсизлар, қорақалпоқ заминида яшаб, ишлаётган одамларнинг эртаси бугунидан яхши бўлиши учун катта марраларни олганмиз.
Бунинг учун ҳамжиҳат бўлиб, олдимизда турган қийинчиликларни енгиб ўтиш учун биргаликда ҳаракат қилишимиз шарт ва зарур.
Мақсадимиз битта – азалдан дўст-қардош, оға-ини, қуда-анда бўлиб яшаётган ўзбек ва қорақалпоқ оилаларининг тинч ва фаровон, бахтли ҳаётини таъминлаш.
Қилаётган барча ишларимиз, келгусида амалга оширадиган улкан режа ва дастурларимиз замирида айни шу мақсад ётибди”, деди давлат раҳбари.
Қорақалпоқ заминида эл-юрт учун ўзини аямасдан меҳнат қилишга бел боғлаган инсонлар, кўзи ёниб, келажакка талпиниб турган азму шижоатли ёшлар кўплиги, фақат уларнинг йўлини очиб бериш, эзгу ғоя, ташаббус ва интилишларини қўллаб-қувватлаш зарурлиги қайд этилди.
"Илгари ҳам айтганимдек, ўзбек ва қорақалпоқнинг тарихи ҳам, тақдири ҳам бир. Ва мен ишонаман, бизнинг ёруғ, бахтли келажагимиз ҳам албатта бир бўлади", деди Президент сўзининг якунида.
Йиғилишда мутасаддиларнинг ҳисоботлари тингланди, Қорақалпоғистон жамоатчилиги билан очиқ мулоқот қилинди.
Изоҳ (0)