Qoraqalpog‘istonda o‘tgan yig‘ilishda prezident Shavkat Mirziyoyev azaldan do‘st-qardosh, og‘a-ini, quda-anda bo‘lib yashayotgan o‘zbek va qoraqalpoq oilalarining tinch va farovon, baxtli hayotini ta’minlash asosiy maqsad ekanini ta’kidladi.
“Ko‘rib turibsizlar, qoraqalpoq zaminida yashab, ishlayotgan odamlarning ertasi bugunidan yaxshi bo‘lishi uchun katta marralarni olganmiz.
Buning uchun hamjihat bo‘lib, oldimizda turgan qiyinchiliklarni yengib o‘tish uchun birgalikda harakat qilishimiz shart va zarur.
Maqsadimiz bitta – azaldan do‘st-qardosh, og‘a-ini, quda-anda bo‘lib yashayotgan o‘zbek va qoraqalpoq oilalarining tinch va farovon, baxtli hayotini ta’minlash.
Qilayotgan barcha ishlarimiz, kelgusida amalga oshiradigan ulkan reja va dasturlarimiz zamirida ayni shu maqsad yotibdi”, dedi davlat rahbari.
Qoraqalpoq zaminida el-yurt uchun o‘zini ayamasdan mehnat qilishga bel bog‘lagan insonlar, ko‘zi yonib, kelajakka talpinib turgan azmu shijoatli yoshlar ko‘pligi, faqat ularning yo‘lini ochib berish, ezgu g‘oya, tashabbus va intilishlarini qo‘llab-quvvatlash zarurligi qayd etildi.
"Ilgari ham aytganimdek, o‘zbek va qoraqalpoqning tarixi ham, taqdiri ham bir. Va men ishonaman, bizning yorug‘, baxtli kelajagimiz ham albatta bir bo‘ladi", dedi Prezident so‘zining yakunida.
Yig‘ilishda mutasaddilarning hisobotlari tinglandi, Qoraqalpog‘iston jamoatchiligi bilan ochiq muloqot qilindi.
Izoh (0)