Президент бошчилигида ўтказилаётган йиғилишда, ўтган йили Қорақалпоғистондаги саноат лойиҳалари учун 100 миллион доллар ресурс берилгани маълум қилинди.
Нукус шаҳрида саноат ипотекаси асосида тадбиркорларга бериладиган 35 минг квадрат метр майдони бор илк лойиҳа ишга тушмоқда. Бир ой ичида яна бир шундай объект фойдаланишга топширилади.
Мутасаддиларга ушбу тажрибани оммалаштириб, йил якунигача Нукус эркин иқтисодий зонаси ҳудудида замонавий технопарк ташкил қилиш топширилди. Бунда, бизнес учун тайёр бинолар қурилиб, тадбиркорларга 10 йилга лизингга беради.
Шунингдек, Қорақалпоғистонда саноатни ривожлантириш учун яна 100 миллион доллар йўналтирилади.
Нукус шаҳрида 1 миллион доллар, қолган туманларда 300 минг доллар инвестиция киритиш шарти билан Қорақалпоғистон Вазирлар Кенгаши қарори асосида ер участкалари тўғридан тўғри берилмоқда.
Кичик инвестицияларга ҳам ер тўғридан тўғри берилса, инвесторлар Нукус шаҳри, туман марказлари ва йўл бўйларида камида 2 минг аҳолини иш билан таъминламоқчи.
Давлат раҳбари бундай кичик ва ўрта лойиҳаларга ерни тўғридан тўғри ажратиш таклифини маъқуллади.
Умуман, Қорақалпоғистонда амалга оширса бўладиган яна 9,5 миллиард долларлик 120 та истиқболли лойиҳалар тайёрланган.
Сентябрь ойида Қорақалпоғистонда йирик Инвестиция форумини ўтказиш режа қилинган. Масъулларга форумга пухта тайёргарлик кўриш топшириғи берилди.
Изоҳ (0)