Француз актёри Ален Делон 88 ёшида вафот этди. Бу ҳақда унинг фарзандлари хабар беришди, деб ёзди “РБК”.
Фото: “РБК”
“Ален Фабиэн, Аннушка, Энтони ва унинг Лоубо лақабли ити оталарининг вафот этганини катта қайғу билан эълон қилади. У ўз уйида, уч нафар фарзандининг олдида тинчгина жон берди”, дейилади хабарда.
2019 йилда актёр инсульт касаллигини бошидан ўтказди, шундан сўнг Ален Делон Швейцариянинг ЛъИллустре нашрига эвтаназия қилишга (бемор ўлимини сунъий равишда тезлаштириш) қарши эмаслигини айтган эди.
“Мен ҳозирда яшаб келаётган замондан нафратланаман, бу даврлар мени касал қилади”, деган эди у 2018 йилда.
Актёрнинг тан олишича, агар унинг ити актёр ўлганидан кейин тирик қолса, у ҳолда итни ҳам ўлдириш учун шифокордан укол қилишларини сўраган.
Ален Делон 1935 йил 8 ноябрда Парижда туғилган. У бир неча марта мактаблар ва мактаб-интернатлардан ҳайдалган ва 17 ёшида Ҳинди Хитойга денгизчи бўлиб ишлаш учун кетган ва беш йилдан сўнг ватани Францияга қайтиб келган. Делон ҳаёти давомида кўп марта касбларини ўзгартирди: у юк ташувчи, официант, бармен каби касбларда ишлади.
Бир куни Аленни барда кино агентлари учратиб қолади ва унга “Аёллар аралашганда” фильмида рол ижро этишни таклиф қилади. Делон бунга рози бўлади ва экрандаги дебютидан атиги уч йил ўтгач, “Рокко ва унинг биродарлари” (1960) криминал драмасидаги бош роли учун халқаро эътирофга сазовор бўлади.
Делон иштирокидаги энг фильмлар орасида “Ёрқин қуёшда”, “Самурай” (1967), “Борсалино” (1970), “Зорро” (1975) каби фильмлар машҳурдир.
Изоҳ (0)