“Музей таъмири ва суратларнинг сотувга чиқиши ўртасида боғлиқлик йўқ”. Интернетда сотилаётган қимматбаҳо асарлар юзасидан изоҳ берилди

Ижтимоий тармоқларда Ўзбекистон давлат санъат музейининг таъмир учун ёпилиши ортидан қимматбаҳо асарларнинг сотуви бошлангани айтилган хабарлар тарқалди. 

Манзарачи рассом, рангтасвир устаси Ўрол Тансиқбоев муаллифлигидаги сурат тармоқларда 756 миллион сўмга баҳоланган бўлса, италиялик рассом асари 37 миллионга сотилиши мумкинлиги маълум қилинган. 

Ушбу рақамлар билан боғланиб чиқдим. Бирининг рақами ишламаяпти, тушолмадим. Бири бу расм хусусий мулки экани ва Америкадан аукционда сотиб олганини айтди. Яна бири эса отаси Тошкентда бой инсон бўлгани ва ўша вақти бу расмларни сотиб олганини тушунтирди. Ҳаммаси ушбу расмларни сотиб олсангиз, муаммо бўлмаслигини айтмоқда. Бироқ мен ишонмадим. Давлатнинг ваколатли идоралари ўзи текширув ўтказишини сўрайман, дейди қимматбаҳо асарларга қизиқиб кўрган блогер Зафар Солижонов. 

Яна бир жамоатчилик фаоли, тилшунос, журналист ва блогер Элдар Асанов қимматбаҳо суратларнинг интернетдаги эълонлар сайтида сотилишини шубҳали деб атаган.

Бу ҳолатни, албатта, текшириш керак, дейди у. 

Маданий мерос агентлиги ҳолатга изоҳ берар экан, “музей таъмири ва суратларнинг сотувга чиқиши ўртасида боғлиқлик йўқ”лиги маълум қилинди. 

Билдирилишича, ҳолат ўрганилган.

Мазкур ҳолат юзасидан Маданий мерос агентлиги музей кураторлари билан биргаликда юқорида қайд этилган санъат асарларини синчковлик билан кўздан кечирди. Бу ҳақдаги тегишли суриштирув ва тушунтириш ҳисоботлари музей муҳофизлари томонидан атрофлича қиёсий ўрганилди. Суратлар музей коллекциясига мансуб эмаслиги ҳамда уларнинг электрон сотувга чиқарилиши билан Ўзбекистон давлат санъат музейининг реконструкция ва жорий таъмирлаш учун ёпилиши ўртасида ҳеч қандай боғлиқлик мавжуд эмаслигини алоҳида таъкидламоқчимиз, дейилади масъуллар изоҳида.

Маданий мерос агентлиги ахборот хизмати раҳбари Моҳинур Имомованинг маълум қилишича, Ўзбекистон давлат санъат музейининг барча экспонатлари тўлиқ рақамлаштирилади. 

Давлат музейларидаги электрон идентификация қилинувчи музей ашёлари ва сара тўпламлари сони барқарор ўсишда давом этаётганини маълум қиламиз. Ҳозирда давлат музейлари фондларидаги музей ашёлари тўпламлари сони 2 525 023 тани ташкил этади, шундан, 1 815 211 таси асосий фондда 709 812 таси илмий-ёрдамчи фондда сақланмоқда, 82 067 таси эса музей экспозицияларида намойиш этилмоқда. Фурсатдан фойдаланиб, ижтимоий тармоқларнинг жамоат ишларида фаол ва таъсирчан фойдаланувчиларига Ўзбекистон давлат санъат музейи томонидан санъат ашёларини безавол ва бус-бутун сақлаш масалаларига бефарқ эмасликлари учун миннатдорчилик изҳор қилиб, топикстартерларга ўзларининг аудиторияси олдидаги масъулиятини ҳис қилган ҳолда ҳамда маълумот тарқатиш одобига риоя этиб, бундай масалаларда шошма-шошарликка йўл қўймасликка ва музей ёки ваколатли давлат органи орқали тарқатилаётган маълумот ҳақиқатга мос келиши юзасидан қўшимча ўрганишга чақириб қоламиз. Музейлар томонидан мисқоллаб йиғилаётган ишончга ва ишчанлик обрўсига путур етказишдан сақланишни тавсия этган ҳолда, келгусида мамлакатимиз маданий мероси масканлари ва ашёларига нисбатан ноқонуний муносабатда бўлиш ҳолатлари аниқланса, бу ҳақда агентлик ва ҳуқуқни муҳофаза қилиш органларига хабар беришларини сўраб қоламиз, дейди масъуллар.

2022 йил Фарғона вилояти тарихи ва маданияти давлат музейида сақланаётган ноёб экспонатлар қалбакилаштирилгани, ҳолат юзасидан жиноят иши қўзғатилгани хабар берилганди.