Фарғона вилоятидаги давлат музейида ёнғин содир бўлган. Бу ҳақда “Дарё”га хабар берган музей ходимига кўра, ёнғин натижасида 1850 йилларда ясалган нақшли масжид эшиги, 1898 йилда Англия қуролсозлари томонидан кашф этилган М-98 русумли 2 дона милтиқ қўндоқлари ёнган.
“Дарё” журналисти билан суҳбатда бўлган Фарғона вилояти тарихи ва маданияти давлат музейи раҳбари Хайрулло Зокиров музейда ёнғин эмас, қисқа туташув бўлганини маълум қилди.
Музейда эскириб кетган электр симлари орқали чиққан қисқа туташувдан ҳеч қандай зарар етмаган, — деди музей раҳбари.
Музей масъули журналистнинг “1850 йилларда ясалган нақшли масжид эшиги, 1898 йилда Англия қуролсозлари томонидан кашф этилган М-98 русумли 2 дона милтиқ қўндоқлари ёнмаган бўлса, уларнинг суратини тақдим қилоласизми?”, деган саволига, айни пайтда музейда электр токи йўқлигини, шу сабаб ичкарини суратга ололмаслигини айтиб, жавоб қайтарди.
Манбанинг ёзишича, ёнғин 2024 йилнинг 11 апрель куни соат тахминан 10:00 ларда содир бўлган.
Ёнғин музейнинг иккинчи қаватидаги экспозиция залида содир бўлган. Натижада 1850 йилларда ясалган нақшли масжид эшиги — ноёб экземпляр, 1898 йилда Англия қуролсозлари томонидан кашф этилган М-98 русумли 2 дона милтиқ қўндоқлари ёнган. Рассом Гавриловнинг “Ур миршабни” деб номланган, 1916 йилги қўзғолон тасвирланган картинасига шикаст етган, — дейди исм-шарифи сир қолишини сўраган манба.
Бу ҳақда “Дарё”га маълумот берган иккинчи манбага кўра, айни пайтда музейнинг кўргазма зали вилоят Фавқулодда вазиятлар бошқармаси томонидан муҳрланган.
1896 йилда ташкил топган Фарғона вилояти тарихи ва маданияти давлат музейидаги ёнғинда бир қанча эксонатларга зиён етган. Айрим экспонатлар ёниб кул бўлган. Ёнғинни ўт ўчирувчилар бартараф қилишган бўлишига қарамай воқеа кенг жамоатчиликдан яширилмоқда, — дейди у.
Манбаларнинг қўшимча қилишича, музейнинг ёнғиндан хабар бериш тизими анчадан буён ишламаётган бўлган.
Ёнғин бўлган жой муҳрлангани сабабли у ернинг суратини тақдим қилолмайман, — дейди иккинчи манба.
“Дарё” журналисти бир-биридан мустақил манбалар берган ахборотга аниқлик киритиш мақсадида вилоят Фавқулодда вазиятлар бошқармаси ахборот хизмати раҳбари Аҳлиддин Алижонов билан телефон орқали боғланиб, ёнғин ҳақида бошқармага қачон хабар берилгани билан қизиқди. Бироқ масъул айни пайтда унда аниқ ахборот йўқлигини, бир оздан сўнг, батафсил маълумот беришини айтди. Аммо айтилган вақтда на телефон қилди на телефон қўнғироқларига жавоб қайтарди.
Музейни айланиш учун бориб, уч кундан бери унга киролмаётганини ёзган “Дарё” ўқувчисининг маълумот беришича, у ёнғинга гувоҳ бўлган.
Мен ўша куни музейда эдим. Кейин кетма-кет уч кун айланиш мақсадида музейга яна бордим. Музей ёпиқ. Шу ҳақида хабар беринг. Ёнғиндан мутасадди ташкилотларнинг хабари йўқ, шекилли, — дейди кузатувчи.
Аввалроқ ушбу музейда 2,5 миллиард сўмлик ноёб экспонатлар қалбакилаштирилгани, вилоят ИИБда эса 7 та асар йўқолгани маълум бўлганди. “Дарё” мухбири эса мазкур музейдаги сирли ўғриликлар ҳақида ўрганиб, журналистик суриштирув ўтказганди.
Изоҳ (0)