Прокуратура органлари томонидан Фарғона вилояти тарихи ва маданияти давлат музейида содир бўлган ёнғин ҳолати юзасидан терговга қадар текширув ўтказилмоқда. Бу ҳақда Бош прокуратура матбуот хизмати хабар берди.
Дастлабки текширувда, 2024 йил 11 апрель куни мазкур музейнинг иккинчи қаватида ёнғин келиб чиқиши оқибатида музей экспозициясида намойишга қўйилган ХIX асрга оид масжид эшиги ҳамда қадимий милтиқнинг қўндоғи ёниб зарарлангани аниқланган.
Ҳозирда мутахассислар иштирокида текширув ҳаракатлари давом эттирилмоқда, натижалар юзасидан қонуний қарор қабул қилиниб, қўшимча равишда маълумот берилади.
“Текширув ҳаракатлари Бош прокуратура томонидан назоратга олинган”, — дейилади хабарда.
Аввалроқ музей ходими “Дарё”га ёнғин натижасида 1850 йилларда ясалган нақшли масжид эшиги, 1898 йилда Англия қуролсозлари томонидан кашф этилган М-98 русумли 2 дона милтиқ қўндоқлари ёнгани тўғрисида хабар берганди.
Ўз навбатида Фарғона вилояти тарихи ва маданияти давлат музейи раҳбари Хайрулло Зокиров музейда ёнғин эмас, қисқа туташув бўлганини маълум қилган.
Изоҳ (0)