Фарғонадаги музейда 2,5 миллиард сўмлик ноёб экспонатлар қалбакилаштирилгани аниқланиб, ҳолат юзасидан жиноят иши қўзғатилган, дея хабар берди «Дарё» мухбири.
Қайд этилишича, Бош прокуратура томонидан Фарғона вилояти тарихи ва маданияти давлат музейи ўрганилган.
Ўрганиш давомида музейда сақланаётган умумий баҳоси 2,5 млрд сўмлик 70 та ноёб экспонатлар (улардан 56 таси рангтасвир асари) қалбакилаштирилгани, музейни капитал таъмирлаш учун бюджетдан ажратилган 3,1 млрд сўм маблағнинг 1,4 млрд сўми мансабдор шахслар томонидан талон-торож қилингани аниқланган.
Шунингдек, музейда сақланиши лозим бўлган 1 дона рангтасвир ва 1 дона графика асари топилмаган.
«2011 йил 21 номдаги ашёларнинг ҳақиқийлигини текшириш мақсадида улар музей томонидан Фарғона вилояти Ички ишлар бошқармасига топширилган. Улардан 14 номдаги ашёлар 2016–2020 йиллар давомида музейга қайтарилган, аммо қолган 7 дона рангтасвир асари қайтарилмаган. Ҳозирги кунда Фарғона вилояти Ички ишлар бошқармасида ушбу 7 дона рангтасвир асарлари мавжуд эмаслиги аниқланган», — дейди «Дарё» мухбири билан суҳбатлашган манба.
Бош прокуратура матбуот хизматининг маълум қилишича, ҳолат юзасидан жиноят иши қўзғатилиб, тергов ҳаракатлари олиб борилмоқда.
Изоҳ (0)