Ижтимоий тармоқларда икки нафар фуқаро Ўрта Осиё чўл тошбақасига мажбурий равишда нос чектиргани ҳақида хабар тарқалди. Экология вазирлиги ахборот хизмати ҳолат юзасидан маълумот берди.
Унга кўра, Сурхондарё вилояти Экология, атроф-муҳитни муҳофаза қилиш ва иқлим ўзгариши бошқармаси, вилоят ИИБ ҳамда вилоят Миллий гвардия бошқармаси ходимлари томонидан ўрганиш ишлари олиб борилди. Ўрганиш давомида юқоридаги ҳолат Денов тумани “Янгикуч” маҳалласида истиқомат қилувчи фуқаролар Ҳ.Н. ва М.Н. томонидан апрель ойи бошларида содир этилгани маълум бўлди.
Яъни Ҳ.Н. ижтимоий тармоқдаги шахсий саҳифасига жойлаш учун маҳалласидаги даштликдан тошбақани ушлаб, нос чектирган.
Ҳолат юзасидан икки нафар фуқаронинг ҳар бирига нисбатан Маъмурий жавобгарлик тўғрисидаги кодекснинг 111-моддасига асосан БҲМнинг 3 баробари — 1 миллион 20 минг сўм миқдорида жарима белгиланди.
Аввалроқ Фарғонада 83 дона тошбақаларни қўшни давлатга олиб чиқиб кетмоқчи бўлган шахс қўлга олинганди. Мазкур тошбақалар Фарғона ҳайвонот боғи мутахассислари иштирокида кўздан кечирилганида Ўзбекистон “Қизил китоби”га камайиб бораётган тур сифатида киритилган Ўрта Осиё чўл тошбақаси экани ва 5 донаси нотўғри ташилгани сабабли зарарланганлиги маълум бўлган ва тиббий муолажалар кўрсатилган.
Изоҳ (0)