АҚШга ноқонуний миграция бўйича кўмак берувчи ва ундан фойда кўрувчи шахслар, мамлакат ҳукумати томонидан жазоланади. Бу ҳақда АҚШнинг Ўзбекистондаги элчихонаси хабар берди.
Мигрантлар учун АҚШга ноқонуний сафарни режалаштириб ва ташкиллаштириб берувчи виза агентликлари, туроператорлар ва туристик ташкилотлар, АҚШ визасини олиш имкониятига эга бўлмайди.
Қўшма Штатлар Иммиграция ва фуқаролик тўғрисидаги қонуннинг тегишли бўлимига мувофиқ, виза чекловларига оид сиёсатини кенгайтирди. Бу билан мамлакатга тартибсиз миграцияни осонлаштирувчи ва муҳожирларни эксплуатация қилишдан фойда олувчи шахсларга виза берилиши чекланади.
“Ушбу кенгайтирилган сиёсатни йўлга қўйиб, ҳукумат ва хусусий сектордаги ҳамкорлар билан Ғарбий яримшарда ва ундан ташқарида эксплуатация амалиётларини бартараф этиш бўйича янада кенгроқ кампаниямиз доирасида инсофсиз транспортация раҳбарларига нисбатан виза чекловларидан фойдаланишни давом эттирамиз. Ҳеч ким — контрабандачилар ҳам, хусусий компаниялар ҳам, давлат амалдорлари ҳам ёки бошқалар ҳам заиф муҳожирлардан фойда кўрмаслиги керак”, дейилади АҚШ давлат департаменти хабарида.
2023 йилнинг 20 декабрида АҚШга ноқонуний йўллар билан кетган 119 нафар ўзбекистонлик олиб келинганди. 2024 йилнинг 3 мартида шундай кишиларнинг 74 нафари Ўзбекистонга қайтарилди. АҚШнинг Ўзбекистондаги элчихонаси ушбу мамлакатга ноқонуний миграция хавфли ва серхаражат уриниш эканлиги ҳақида фуқароларга доимий равишда огоҳлантириб келади.
Изоҳ (0)