AQSHga noqonuniy migratsiya bo‘yicha ko‘mak beruvchi va undan foyda ko‘ruvchi shaxslar, mamlakat hukumati tomonidan jazolanadi. Bu haqda AQSHning O‘zbekistondagi elchixonasi xabar berdi.
Migrantlar uchun AQSHga noqonuniy safarni rejalashtirib va tashkillashtirib beruvchi viza agentliklari, turoperatorlar va turistik tashkilotlar, AQSH vizasini olish imkoniyatiga ega bo‘lmaydi.
Qo‘shma Shtatlar Immigratsiya va fuqarolik to‘g‘risidagi qonunning tegishli bo‘limiga muvofiq, viza cheklovlariga oid siyosatini kengaytirdi. Bu bilan mamlakatga tartibsiz migratsiyani osonlashtiruvchi va muhojirlarni ekspluatatsiya qilishdan foyda oluvchi shaxslarga viza berilishi cheklanadi.
“Ushbu kengaytirilgan siyosatni yo‘lga qo‘yib, hukumat va xususiy sektordagi hamkorlar bilan G‘arbiy yarimsharda va undan tashqarida ekspluatatsiya amaliyotlarini bartaraf etish bo‘yicha yanada kengroq kampaniyamiz doirasida insofsiz transportatsiya rahbarlariga nisbatan viza cheklovlaridan foydalanishni davom ettiramiz. Hech kim — kontrabandachilar ham, xususiy kompaniyalar ham, davlat amaldorlari ham yoki boshqalar ham zaif muhojirlardan foyda ko‘rmasligi kerak”, deyiladi AQSH davlat departamenti xabarida.
2023-yilning 20-dekabrida AQSHga noqonuniy yo‘llar bilan ketgan 119 nafar o‘zbekistonlik olib kelingandi. 2024-yilning 3-martida shunday kishilarning 74 nafari O‘zbekistonga qaytarildi. AQSHning O‘zbekistondagi elchixonasi ushbu mamlakatga noqonuniy migratsiya xavfli va serxarajat urinish ekanligi haqida fuqarolarga doimiy ravishda ogohlantirib keladi.
Izoh (0)