Ким Чен Иннинг қизи биринчи марта омма олдига чиқди (фото)

Шимолий Корея давлат агентлиги «Хвасон-17» қитъалараро баллистик ракетаси учирилгани ҳақида хабар берди, парвоз жараёнида КХДР давлат кенгаши раиси Ким Чен Ин, унинг рафиқаси Ли Сол Чжу ва қизи (исми Ким Чжу Э деб тахмин қилинади) қатнашган. Уни Корея Марказий телеграф агентлиги томонидан эълон қилинган бир нечта суратларда кўриш мумкин, бу Шимолий Корея етакчиси қизининг омма олдига биринчи марта чиқишидир.

«Пхеньян халқаро аэропортидан учирилган янги турдаги ‘Хвасон-17’ қитъалараро баллистик ракетаси 4135 сония учди, парвоз масофаси 998 километрни, максимал баландлик эса 6040,9 километрни ташкил қилди», — дейилади КМТАнинг ракета синови ҳақидаги мақоласида.

Унга илова қилинган суратларнинг тўрттасида мактаб ёшидаги қизча бўлиб, у Ким Чен Иннинг қўлидан ушлаб, у билан бирга ҳарбий техникани кўздан кечириб юрибди. Мақолада қизчанинг кимлигига тўхталиб ўтилмаган.

2013 йилда Шимолий Кореяга ташриф буюрган баскетболчи Деннис Родман Ким Чен Иннинг «кичкина қизчаси» борлигини, унинг исми Чжу Э эканини айтганди. «Мен уларнинг фарзанди Чжу Эни қўлимда кўтардим ва Ри хоним билан суҳбатлашдим», — дея спортчи ўз сафаридан кейин журналистларга гапириб берганди.

18 ноябрь куни Шимолий Корея Корея ярим оролидан шарққа қарата катта масофали баллистик ракета учирди. Япония Мудофаа вазирлиги маълумотларига кўра, снаряд Корея ярим оролининг ғарбий соҳилларидан учирилган ва Япония иқтисодий зонасига — Хоккайдо оролидан ғарбга, денгизга келиб тушган.